Internet pitsaanerusoq akikinnerusorlu

Internet

Naalakkersuisut internettimut pitsaanerusumut akikinnerusumullu sinaakkutissat isumannaarpaat.

Nuna tamakkerlugu, sumiiffinni unammilleqatigiinnissamut tunngavissaqarfiusuni aammalu sumiiffinni nalunaarasuartaateqarnermi suliaqarnermik imminut akilersinnaasumik ingerlatsiviusinnaanngitsuni, internettip pitsaanerunissaa akikinnerunissaalu Naalakkersuisut kissaatigaat.

Peqqissutsimut Attaveqarnermullu Naalakkersuisoq Steen Lynge oqarpoq: ”Unammilleqatigiinneq ingerlasinnaassappat niuerfimmi ammanerulersitsinermut sinaakkutissat inissinneqartariaqarput. Naligiimmik atugassaqarfiusumik unammilleqatigiinnissaq qulakkeerneqassaaq. Sumiiffinni unammilleqatigiinnissamut tunngavissaqarfiusuni nalunaarasuartaateqarnermut ingerlatseqatigiiffiit sullitassat pillugit imminnut unamminerisa, innuttaasunut inuussutissarsiortunullu nuannaarutaasumik tunisassianik neqerooruteqarneq annertusitissavaat aammalu akigititat tatisimaneqartuaannalersissallugit.”

Nalunaarasuartaateqarnermut Aqutsisoqarfik nalunaarasuartaateqarnermut niuerfimmi aammalu naligiimmik atugassaqarfiusumik unammilleqatigiinnermut nakkutilliisuuvoq. TELE-POST-ip naatsorsuutaasa aggulunneqarnissaat pillugu maleruagassanik Naalakkersuisut aalajangersaapput, taamaalillutik ulluinnarni atugassanut tunngasunut aamma amerlasuukkaartunik pisiniartarnermut niuerfik immikkoortinneqarlutik. Tamatuma saniatigut Nalunaarasuartaateqarnermut Aqutsisoqarfik, neqerooruteqartut nutaat TELE-POST-itut atugassaqartitsiviusumik akeqartitsiviusumillu niuerfimmiilersinnaanissaat qulakkeerniarlugu, akigititatigut unammilleqatigiissinnaanissamut ilusiliamik inerisaasimavoq.

Internettimut niuerfiup ilaa 2009-imi ammanerulersinneqarpoq, aammalu ineriartorneq taanna 2014-imi internettimut tunngatillugu niuerfiup tamakkiisumik ammaanneqarneratigut ingerlaannassasoq Naalakkersuisut kissaatigaat. Aammattaaq nalunaarasuartaateqarnermi kiffartuussissutinut allanut, assersuutigalugu oqarasuaatinut angallattakkanut, tunngatillugu suli ammanerulersitsineq iluaqutaassanersoq ukiuni aggersuni misissorneqassaaq.

Nunami sumiiffiit ilaanni nalunaarasuartaateqarnermi kiffartuussissutinik niuernermik tunngaveqartumik neqerooruteqarnissaq ajornartussaavoq. Taamaattumik niuerfimmi ammanerulersitsineq kisimiitinneqarsinnaanngilaq.

Taamaalillutik Naalakkersuisut anguniagarilluinnarpaat illoqarfinni nunaqarfinnilu innuttaasut tamarmik 2018-imi 10Mbit/s pallillugu sukkassusilimmik internettersinnaassasut. Tamanna maannakkut sukkassutsimut aallaaviusut 20-eriaataat pallillugu sukkaneruvoq. Aammattaaq innutaasut 80 %-ii 30Mbit/s-imik atuisinnaassapput. Tamatumani attaveqarnerup annertusarneqarnissaa pisariaqartussaavoq.

Sumiiffinnut niuernermik tunngaveqartumik ingerlatsiviusinnaanngitsunut annertusaanissamut aningaasalersuineq karsimit ataatsimoorussamiissaaq, tamanna nalunaarasuartaatileqatigiiffiit tamarmik nammaqatigiittumik akilissallugu.

Naalakkersuisoq, Steen Lynge, oqarpoq: ”Attaveqarnerup ingerlaavartumik ineriartortinneqarnissaa, aammalu nalunaarasuartaateqarnikkut attaveqaqatigiinnerup nunatsinni isorartoorsuarmi ataqatigiissitsinissaa pingaaruteqarpoq, taamaalilluni inuiaqatigiinni kikkut tamarmik peqataasinnaassallutik. Attaveqarnermi annertusaanernut aningaasalersuinissaq isumagineqareerpoq, aamma sumiiffinni niuernermik tunngaveqartumik neqerooruteqartut niuernermik ingerlatsisinnaanngiffiini. Taamaattumik erseqqissassavara niuerfimmi ammanerulersitsineq nuna tamakkerlugu attaveqarnerup ineriartortinneqarnissaanik anguniagaqarnermut ataqatigiissinneqarluarsinnaammat.”

Niuerfimmi ammanerulersinneqartumi TELE-POST unammillertaasunit unammillerneqarnermut sukkasuumik qisuariarsinnaassaaq, taamaattumillu Naalakkersuisut aalajangerput TELE-POST akisussaaffeqarluni kiffaanngissuseqarnerulissasoq, taamaalilluni maannakkut taamaallaat akigititanik qaffaanerit akuersissuteqarfigineqartalissallutik. Aalajangiineq aalajangersimasumik isumaqarpoq TELE-POST internettimut kiffartuussissutinut, akigititat appartinneqarnerat pineqartillugu, akigititanik nammineerluni aalajangersaasinnaasoq.

Naalakkersuisoq, Steen Lynge oqarpoq: ”Naapertuilluartumik unammilleqatigiinnerup malitsigisaanik akigititat apparnerat neriulluarnartutut isigaara aammalu neriuppunga TELE-POST-ip maannakkut periarfissat taakkua Naalakkersuisut periarfissiissutigisaat atorluassagai.”


Paasissutissanik annertunerusunik piniaruit, saaffigiuk:
Naalakkersuisup allattaa Lea Holm aqqutigalugu Peqqissutsimut Attaveqarnermullu Naalakkersuisoq attaveqarfigineqassaaq oqarasuaammut +299 55 33 03 imaluunniit e-mail-ikkut leah@nanoq.gl