Aalisakkat nunamut tulaassassat suliffeqartitsissapput

Royal Greenland Naalakkersuisunit akuerineqarpoq, suliffeqarfissuup Maniitsumi suliffissuanut qalerallit immikkut tulaassassanngorlugit pisassiissutigineqartut 1.500 tonsit pisarisinnaagai.

Royal Greenlandip kisitsisit saqqummiussai naapertorlugit Maniitsup suliffissuani sulisut 20-nit 30-nut ukioq kaajallallugu sulisinnaalissapput.

Naalakkersuit Baffinip Kangerliumanersuani qaleralittassiissutit 1.500 tonsinik ukioq manna aallartissimalersoq ilavaat uumassusilerisunit taama inassuteqartoqarneratigut.

Naalakkersuisut suliffissanik nutaanik pilersitsinissaq siunertaralugu, nunami suliffissuarmi taakku tamaasa nunami suliarineqartussatut piumasaralugu aalajangiipput.

Royal Greenlandip Maniitsumi suliffissuani qalerallit suliarineqartarnissaat ilaatigut toqqaanermut pissutaavoq, illoqarfimmi suliffissaaleqisut amerlammata.