Qaninnerusumik ataqatigiissinneqassapput

Air Greenland-ip Tunumi Kulusuup aamma Nerlerit Inaata akornanni timmisartuussisarneq allannguuteqartissinnaagaa Naalakkersuisut akueraat. Tunumi illoqarfiit marluk taakkua taamaattumik toqqaannartumik ataqatigiissinneqassapput.

Air Greenland siusinnerusukkut Kangerlussuarmiit Nerlerit Inaannut toqqaannartumik timmisartuussisaraluarpoq. Kulusummut akunnilluni mittalernermi Nerlerit Inaannut tassanngaaniillu aqquteqartarnera akulikinnerulersinnaalerpoq, peqatigisaanillu Tunumi angallanneq pitsaanerulissalluni.

Allannguuteqartitsinissaq Naalakkersuisut akuerissallugu aalajangerput, pissutigalugu Kulusuup aamma Nerlerit Inaata akornanni toqqaannartumik angalasinnaalerneq innuttaasunut pisortanullu iluaqutaasorujuusuussammat.

Kulusummut aqquteqalernerani ilaatigut Ittoqqortoormiini innuttaasut Kulusukkoorlutik Islandimut aqqutissaqalernissaat periarfissaqalissaaq.

Kiffartuunneqarnissamut isumaqatigiissutip ataani siusinnerusukkut Nerlerit Inaanniit Islandimut aasaanerani aallartarnerit arfineq pingasuupput. Timmisartuussisarnerit taakkua ingerlanneqassanngillat, pissutigalugu Nerlerit Inaata aamma Islandip akornanni niuernermik tunngaveqartumik aqquteqalersitsisoqareermat. Atugassarititaasut niuernermik tunngaveqartut tunngavigalugit timmisartuussisoqarsinnaatillugu, aqqutit aalajangersimasut kiffartuunneqarnissamut isumaqatigiissuteqarnikkut tapersiivigineqartassappata, tamanna unammilleqatigiinnermut equtitsinerusussaavoq.

Ilaatigut Air Greenland-imut kiffartuunneqarnissamut isumaqatigiissutit atuuffissaat ukiup naanerani atorunnaartussaapput. Taamaattumik ilaatigut kommunit aamma takornariartitsisarnermi inuussutissarsiortut, taakkua siunissami angallasseriaaseq qanoq pitsaanerusumik aaqqissuunneqarsinnaanersoq ilassuteqarnissaannut, Naalakkersuisut oqaloqatigaat.

Tassunga atatillugu Naalakkersuisut neqeroortitsinissaq pilersaarusiorpaat, tassani suliaqartussat soqutiginnittut suliassanut aaqqiissutissanut neqerooruteqarnissamik periarfissaqassallutik.

Annertunerusumik paasisaqarusunnermi attaveqarfigineqarsinnaavoq
Steen Lynge oqarasuaat: 34 66 05 imaluunniit oqarasuaat angallattagaq: 55 33 03