Inatsisartut Naalakkersuisullu isumasioqataapput

Fiskeriseminar

Naalakkersuisuni ilaasortat tamarluinnangajammik Aalisarnermut, Piniarnermut Nunalerinermullu Naalakkersuisup, Finn Karlsenip aalisarneq pillugu isumasioqatigiinneq Hotel Hans Egedep ataatsimiittarfissuani ullaap tungaani ammarmagu najuupput. Inatsisartuni ilaasortat amerlaqisut aamma ammaanermi najuupput. Inatsisartuni ullumi oqaluuserisassaat ataasiinnaalluni.

Isumasioqatigiinnermik aaqqissuisut ilimagaat isumasioqatigiinnerup ammarnerani najuuttut 160-it missaanniissasut. Isumasioqatigiinnissamut peqataasussat allattorsimaffiat naapertorlugu peqataasussat 140-it missaanniipput.
KNAPK, Sulisitsisut Peqatigiiffiat, NUSUKA aamma SQAPK najuuttunut ullaap tungaani isummaminnik saqqummiussaqarput, najuuttunit aperineqarsinnaallutik.

Pingasut oqalugiarput. Ataatsip aalisarnerup aningaasaqarnikkut inuiaqatigiinnut pingaaruteqassusia oqalugiaatigivaa, ataatsip avataasiortut aningaasaqarnikkut inissisimanerat pillugu oqaluttuarigaa, pingajuata aalisarnermut aningaasaliissutinut immikkoortitat najuuttunut nassuiaassutigalugit.

Pilersaarutit naapertorlugit isumasioqataasut ullumi eqimattakkuutaartinneqassapput. Eqimattani arfinilinni uku oqaluuserineqassallutik; qaleralinniarneq, raajarniarneq, saarullinniarneq, saattuarniarneq, aalisakkat ikeriinnarmiut pillugit, kiisalu nutarsaalluni aaqqissuussinissat nutaat pilugit.