Inuuneritta peqqissutsimik suliniutinut aningaasanik agguaavoq

Peqqissutsimut Attaveqarnermullu Naalakkersuisup, Steen Lyngep, peqqissutsimik siuarsaanernut pinaveersaartitsinermilu suliniutinut assigiinngitsunut katillugit 23-nut Inuunerittamut Aningaasaliissutinit 224.000 koruunit agguaateqqammerpai.

Upernaaq manna qinnuteqaatit 73-iupput. Meeqqat, inuusuttut ilaqutariillu peqqissusaat inuunerullu pitsaassusaa pillugit suliniutit kiisalu pujortartarnermik pinaveersaartitsinermik suliniut Kalaallillu Nunaani pujortartannginnermut tapersiisut ukioq manna isiginiarneqarput.

Immikkoortuni ukunani suliniutinut tapersiisoqarpoq:
• Pujortartarnermik pinaveersaartitsineq pujortarunnaarniartarnerlu pillugu paasisitsiniutit.
• Maji Peqqinnartuutiguk-mi aaqqissuussinerit
• Aasaanerani sisorarnermik ilinniarnerit
• Atuarfinni meeqqerivinnilu imigassaq, hashi, qinngasaarisarneq, taquartarneq ilaalu ilanngullugit sammillugit oqaloqatigiissitsinerit
• Parkourbane, timi atorlugu pinnguartarfiliaq.

Inuunerittamut aningaasaliissutit Kalaallit Nunaani innuttaasut peqqissusaat pillugu suliniutip Inuuneritta atuutilersinneqarneranut atatillugu pilersinneqarpoq. Peqqissutsimik siuarsaanermut pinaveersaartitsinermilu suliniutinut aningaasanik ukiumut marloriarluni qinnuteqaateqartoqarsinnaavoq.

Inuunerittamit Aningaasaliissutit sumiiffinni pinaveersaartitsinernut peqqissutsimillu siuarsaanermi suliniutinut, Inuuneritta II-mut attuumassuteqartunut, tapersiisarpoq. Ukioq manna pujortartarnerup pinaveersimatinneqarnissaa suliniuteqarfiuvoq.

Inuunerittamit Aningaasaliissutinit qinnuteqarnissamut killissarititaq tulleq tassaavoq 1. oktober 2014. Qinnuteqarnermi immersugassaq aningaasaliissutillu pillugit annertunerusumik paasissutissat uani takusinnaavatit www.peqqik.gl


Annertunerusunik paasisaqarusukkuit, attavigiuk:
Peqqissutsimik suliaqarnermut siunnersorti Nadja Frederiksen, oqarasuaat +299 34 66 76, e-mail: nafr@nanoq.gl imaluunniit peqqissutsimik suliaqarnermut siunnersorti Lisa Christiansen oqarasuaatikkut: +299 346650, e-mail: lich@nanoq.gl