Tunumi misileraalluni qaleralinniartoqassaaq

Aalisarnermut, Piniarnermut Nunalerinermullu Naalakkersuisoq, Finn Karlsen, Tunumi aalisakkanik assigiinngitsunik misileraalluni aalisarsinnaanissamik akuersissuteqarpoq.

Aalisarnermut, Piniarnermut Nunalerinermullu Naalakkersuisoqarfiup Tunup sineriaata qanittuani, 3 sømil qaangernagu, misileraalluni aalisarnissamut soqutiginnittunit arlalissuarnit saaffigineqarsimavoq.

- Naatsorsuutigaarput umiarsuit tunitsiviutigalutik aalisartussat aalisariutinik kujataanersunit, sivisuumik aalisarsimanngitsunik “kalinneqarlutik” Tunup sineriaanukassasut, Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

- Aalisariutit pisatik umiarsuarnut tunisassavaat. Tunisinerminni umiarsuarnit aamma orserneqartassapput. Aalisariutini aalisartut umiarsuarni nioqqutissanik niuersinnaassapput, uffarsinnaassallutik isersimaarsinnaassallutillu. Umiarsuit “anaanarsuartut” pineqassallutik, Finn Karlsen nassuiaavoq, erseqqissaallunilu umiarsuarni tunisassiortoqassanngimmat.

Ningittakkanik qassutinillu aalisarsinnaanermut akuersissummik misileraaniartunut tunniussisoqassaaq. Aalisakkat aalisarneqarsinnaasut tassaallutik; qalerallit, saarulliit, suluppaakkat, nataarnat, najorpilikkat, assagiarsuit, qeeqqat, raajat, kapisillit eqaluillu.

- Kujataani aalisartut aalisarsinnaanissaminnut ukiuni kingullerni periarfissaqarpallaarsimanngitsut ataavartumik aasaanerani aalisarsinnaanissaannut pitsaalluinnartumik periarfissiisoqassaaq, Finn Karlsen erseqqissaavoq.

Naalakkersuisut aalisakkanut assigiinngitsunik 2014-mut TAC-mik aalajangersaanerminni Aalisarnermut, Piniarnermut Nunalerinermullu Naalakkersuisoq misileraalluni aalisarnermi maleruagassiornissaanut piumasaqaasiornissaanullu pisinnaatippaat.

Tamanna tunngavigalugu Aalisarnermut, Piniarnermut Nunalerinermullu Naalakkersuisoqarfik Naalakkersuisumut misileraalluni qinnuteqartunut akuersisinnaaneranut pisinnaatitsilluni.

Misileraalluni aalisarnermi inassutigineqarpoq aalisakkat assigiinngitsut tamaasa misissugassanngortinneqassasut. Aalisakkat aalisarneqarsimasut ilaasa angissusii ullut tamaasa uuttortarneqartassasut, misissorneqarsimasut Pinngortitaleriffimmut ingerlateqqinneqartassallutik.