Finn Karlsen WWF-mut: Qujanaq tunissutissinnut

WWF

Aalisarnermut, Piniarnermut Nunalerinermullu Naalakkersuisoqarfik WWF-mit, pinngortitaq pillugu nunarsuaq tamakkerlugu suliniaqatigiiffimmit ullumi pulaarneqarpoq.

- Qiperukkamut tunissuteqarnermut atatillugu WWF-Danmarkip ataatsimiinnissaanut qaaqqusaasimaninnut qujavunga, taama Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen, Aalisarnermut, Piniarnermut Nunalerinermullu Naalakkersuisoq, Finn Karlsen, sinnerlugu suliniaqatigiiffissuup Danmarkimi immikkoortortaata pisortaanut Gitte Seebergimut, ullumi pulaartumut qiperukkamillu tunniussisumut, oqarpoq.

- Paasivara Kalaallit Nunaata nalinginnaasumik nannunik aqutsineranut qujaniarluni 2013-imilu Moskvami ataatsimeersuarnermi Kalaallit Nunaata USA-mik, Canadamik, Ruslandimik Norgemillu isumaqatigiissuteqarsimaneranik akuerinnilluni WWF nannumik qiperukkamik tunniusserusuttoq, Jørgen Isak Olsen, Finn Karlsen allamik pissuteqarluni ataatsimeeqataasinnaanngitsoq sinnerlugu oqarpoq.

- Nannunut navianaatip tamatuma akiorniarnissaanut immitsinnut pituttuisumik, 2013-imi decembarimi immitsinnut assammippugut nalunaarummullu atsioqatigiilluta. Nalunaarut aamma nunarsuup sinnerani nukissiuutinut ataavartunut ikaariarniarnermut suliniutit annertusisarneqarnissaannik kimigiiserneruvoq, Jørgen Isak Olsen oqarpoq.

- Nunarsuarmi inooqataasutut miluumasunik aalisakkanillu pisuussutit pinngortitap uatsinnut tunniuttagai paarilluassallugit pisussaaffeqarpugut, nukik pinngortitamit pissarsiarisagarput kinguaassatta aamma misigisinnaaniassammassuk. Taamaammat Naalakkersuisut politikkerivaat pisuussutinik uumassusilinnik nungusaataanngitsumik ilisimatuussutsikkullu tunngavilersukkamik siunnersuinermik tunngaveqartumik ingerlanneqassasoq.

- Tamanna pissutigalugu iluarisimaarparput 1985-imili Danskit naalagaaffiannit aqutsineq akisussaaffigileratsigu Pinngortitaleriffiup nunallu allat suliniaqatigiiffisa Naalakkersuisut siunnersuisarnermikkut tapersersortarsimammagu. Sinerissamimi aningaasatigut aaqqissuussiniarnikkullu unammillernartoqarsinnaasartumi, pisuussutit uumassusillit ullumikkut kusanavissumik paasisimasaqarfigilersimavagut.

- Nalunngilarput biologit ilisimasaat assilissap ilaannaminiinnannguarigaa. Taamaattumik kinguariiaanut amerlaqisunut kingumut malittarisinnaasatsinnik, piniartut pisuussutinik uumassusilinnik siullertut atuisuusut qangaaniit ilisimasanik peqarnerat toqqissisaataasarpoq.