Iluarsaassinermik sanaartugassanillu suliassanik aallartisaapput

Suliffinnik pilersitsiniarlutik immikkut ittunik iluarsaassinermik sanaartugassanillu suliassanik Naalakkersuisut aallartisaapput

Naalakkersuisut immikkut ittunik sanaartornermik iluarsaassinermillu suliassat aallartisarnissaat pillugit Aningaasaqarnermut Ataatsimiititaliamut sapaatip akunnerani takkuttussami qinnuteqaateqassapput. 2014-imi sanaartornermik suliat tamarmiusut 174,2 mio. kr.-nik annertusarneqassapput. Sanaartornermik iluarsaassinermillu iliuuserisap suliffissaaleqisut malunnaatilimmik ikilisissinnaavai.

Iliuuserisaq suliaqarfinnut assigiinngitsunut arlalinnut agguataarneqassaaq, soorlu peqqissusermut, ilinniartitaanermut, ineqarnermut, attaveqarfinnut allarpassuarnullu. Taamatuttaaq iliuuserisaq nunamut tamarmut siammartinneqassaaq, sumiiffinnut suliffissaaleqisoqarnerpaasunut sammitinneqassalluni.
”Suliniutit pilersaarutigisat naammassineqannginnerisigut sanaartornermut iluarsaassinermullu aningaasaateqarfimmi aningaasat amerliartuaarsimapput”, Jens-Erik Kirkegaard oqarpoq ilanngullugulu; ”Iliuuserisap massuma sanaartornermik manna tikillugu periusaasup allanngortinnissaanik pisariaqartitsinermik ersersitsivoq. Sanaartornermi suliniutit aningaasanut inatsimmi takuneqarsinnaasut aamma suliniutit ukiuni ataasiakkaani piviusunngortinneqartartut akornanni naapertuuttoqartarnissaa siunissami qulakkeerneqartassaaq. Taamatut aatsaat iliuuseqarutta nunap aningaasaqarneranut suliffeqartitsinermullu iluaqutaasussanik akit nikerarfiini sunniuteqarluartumik politikkeqarnissaq isumannaarsinnaavarput.”

Tunngavigisaq

Suliffeqartitsinissamut pilersitsiniarnerit allat
Naalakkersuisut Kommuninik suleqateqarlutik 2014-imi immikkut ittumik suliffissaaleqisunut iliuuserisap ataani, ukiumoortumik suliffissaaleqisut piginnaanngorsarnissaannut 30 mio. kr.-t missaannik tamakkiisumik atuisoqartarfimmi pilersitanik arlalinnik ingerlatitseqqissimapput.

Suliffissaaleqisunut iliuuserisamiipput suliniutit sammisanik pikkorissartitsinerit, paasisaqarniarluni pikkorissartitsinerit, annertusisamik piginnaanngorsaaqqinnerit, suliffeqartitsinermik sannavinnilu suliniutit aamma Piareersarfinni atuagarsorluni piginnaanngorsaalluni pikkorissartitsinerit. 2014-imi iliuuserisamit tassannga inuit suliffissaaleqisut 1500-t missaat aqqusaarissapput. 

2017-imi suliffissaaleqisut affaannanngortinneri
Piffissamut ungasissumut suliffissaaleqinermut pilersaarutip anguniagaa tassaavoq ukiuni pingasuni takkuttussani suliffissaaleqisut amerlassusaasa affaannanngortinnissaat, pilersitsiniarnerit arlallit, 2017-imi tamakkiisumik atuutsilersimasussat aqqutigalugit.

Pilersitsiniarnerit ilaatigut makkuupput:

  1. Kommunit killeqarfiit akimorlugit sulisussarsiornermik oqilisaasussamik nuna tamakkerlugu suliffinnut nittartagaq akeqanngitsoq
  2. Suliffissarsiuussisarfiit aamma Piareersarfiit akornanni qanimut suleqatigiinnissaq. Aqutsinermik pisariunnginnerusumik pilersitsillunilu sammisatigut attaveqarfinnik nukittunernik pilersitsissaaq, innuttaasunut suliffissarsiortunut iluaqutaasumik
  3. Sulianik ilinniarfinnut ilassutitut aningaasaliinerit isumannaassavaat inuussutissarsiorfinni siuarsakkani takkuttussani nunatsinnit sulisartut sapinngisamik amerlanerpaat suliffeqalernissaat. Qeqertarsuatsiaat eqqaanni rubinisiorfik, aamma Isukasiani saviminissarsiorfik tassaapput suliniutit siulliit atuinissamik akuersissutisisimasut – qaammatinili takkuttussani amerlanerit takkutissapput
  4. Suliffissaaleqisunik naatsorsueqqissaarinermi inuusuttut 29-t inorlugit ukiullit amerlavallaarput. Immikkut ittutut eqqugaasuupput. Ilinniagaqarnermik suliffeqarnermillu ingerlariaqqitsinniarlugit saaffigisanut Piareersarfiit neqeroorutaat nukittorsarneqassapput 2015-imi ilassutitut inissanik 100-nik, 2016-imi 250-inik, 2017-imi 400-nik aamma 2018-imi 600-nik ilasiffigalugit, tamakku inuusuttut suliffissaaleqinerannik malunnaatilimmik annikillisaassapput
  5. Nuttarnerulersitsiniarluni ikiorsiissutit pissarsiarinissaannik oqilisaasumik inatsisissatut siunnersuummik Naalakkersuisut saqqummiusseqqammerput, taamaalilluni suliffissaq pissarsiariniarlugu pisariunnginnerusumik nuuttoqarsinnaalerluni
  6. Sulisartuni nunap avataaneersuni sulinissamut najugaqarnissamullu akuersissutinik ornigulluni nalunaarutigeqqaagaanngitsunik misissuisarnernik Naalakkersuisut pilersitsisimapput, mannalu tikillugu Nuummi suliffeqarfinni sisamani misissuisimallutik, siunissamili misissuisarnerit nuna tamakkerlugu pisalissapput
  7. Ukiuni takkuttussani inuiaqatigiinni innuttaasut sanngiinnerpaat amerlanerit piginnaanngorsaaqqinnermik ingerlatanut ilanngutissapput, aamma inuiaqatigiinni mikinerusuni tamanna sunniuteqarluartuusoq paasineqarsimammat. Ukiuni 2014-miit 2017-imut piginnaanngorsaaqqinnermut katillugit 35,195 mio. kr.-t immikkoortinneqarput
  8. Aammattaaq immikkut ittumik nunaqarfinnut isorliunerusunullu inuussutissarsiorfimmut suliffeqarfimmullu iliuuserisamut Naalakkersuisut aningaasanik immikkoortitsisimapput. 2014-imi kommunit suleqatigalugit inuussutissarsiorfimmut suliffeqarfimmullu iliuuserisat katillugit 24 mio. kr.-nik nalillit aallartisarneqassapput


Erseqqinnerusumik paasissutissarsiornermi attavissat: