Air Greenland A/S ileqquusumik ataatsimeersuarpoq

Generalforsamling hos Air Greenland

Air Greenland ataasinngornermi 22. april 2014 nal. 15.00 kulturikkut illorsuarmi Katuami Nuummiittumi ileqquusumik ataatsimeersuarpoq.

Air Greenlandip ukiumoortumik nalunaarutaata akuersissutigineqarnissaa ataatsimeersuarnermi oqaluuserineqarpoq.

Ukiumoortumik nalunaarummi atuarneqarsinnaavoq angusat ilimagisatut ittut kiisalu ingerlatsinermi missingersuusiarineqarsimasut naammassineqarsimasut.

Ukiumi angusat tunngavigalugit Namminersorlutik Oqartussat sinniisai marluk, Jens Willumsen aamma Julia Pars, qinerneqaqqipput.

”Air Greenland A/S-imi ingerlalluartoqarnera takusinnaagatsigu ingerlatseqatigiiffillu pitsaasumik angusaqarmat nuannaarutigaarput. 2013-imi angusat naammaginartutut isigaavut, ukiumilu aggersumi suleqatigiilluaqqinnissatsinnut qilanaarpugut,” Naalakkersuisut Siulittaasuat Aleqa Hammond oqarpoq.

Paasissutissat sukumiinerusut uunga saaffiginninnikkut pissarsiarineqarsinnaapput:
Rasmus Pedersen, allaffimmi pisortaq, Ingerlatseqatigiiffinnut Allattoqarfik, oqarasuaat 34 51 27