Akuersissutillit 34-t pisassatik tunisimavaat

- Aalisariutaatilik qaleralinnik pisassaminik tunisaqarsimasoq umiatsiaaqqamik qaleralinniarnissamut akuersissummik tunineqarsinnaanngilaq, Aalisarnermut, Piniarnermut Nunalerinermullu Naalakkersuisoq, Finn Karlsen, oqarpoq, erseqqissaallunilu saarullinniarnissamut akuersissummik qinnuteqarnissamut periarfissaqartuaannarmat.

Sinerissap qanittuani aalisartut meterit arfinillit sinnerlugit angissusilinnik aalisariutaatillit 2012-mi pisassaminnik ataasiakkaarlutik tuniniaasinnaanngormatali aalisariutit akuersissutillit 34-t pisassaminnik tunisaqarnissaq aalajangiussimavaat.

- Pisassaminnik tunisisut kingusinnerusukkut qaleralinniaqqissinnaanngillat, aalisartut allat pisassaannik pisiaqarsinnaanngikkunik. Taama Aalisarnermut, Piniarnermut Nunalerinermullu Naalakkersuisoq, Finn Karlsen akissuteqarpoq, Inatsisartuni ilaasortap, Saxtorph Didriksen, paragraf 37 tunngavigalugu apeqqutaanut; aalisariutaatillit pisassaminnik tunisisimasut inuussutissarsiutissaminnut sunut allanut neqeroorfigineqarsimanersut.

- Akuersissutaatillit allamik suliffissaqarnissamik allatulluunniit inuussutissarsiuteqarnissamik neqeroorfigineqartarnerannut tunngatillugu kommunit ataasiakkaat tassaapput innuttaminnut taamalu inunnut ataasiakkaanut suliffissaqartitsiniartussat, Finn Karlsen erseqqissaavoq.

Inatsisartuni ilaasortaq aamma aperivoq qaleralinnut akuersissutaaruttut 32-t aalisariutaataat inuttaallu qassiunersut.

Akuersissutaatillit 34-t aalisarunnaarsimasut tamarmik aalisariuteqarput.

- Aalisariutit sineriammut qanittumi qaleralinniartuni inuttaasut qassiunersut pillugit naalakkersuisoqarfk paasissutissaateqanngilaq, Finn Karlsen oqarpoq.