108-it saarullinniarsinnaalerput

108-it saarullinniarsinnaanermut akuersissuteqalerput

Naalakkersuisuusut apriilip tallimaanni 2013 ivertinneqarnerisa kingorna sinerissap qanittuani aalisartunut saarullinniarnissamut akuersissutit 1173-it tunniunneqarput, taama Aalisarnermut, Piniarnermut Nunalerinermullu Naalakkersuisoq, Finn Karlsen, paragraf 37 tunngavigalugu apeqqummut akissuteqarpoq.

 Inatsisartuni ilaasortaq Saxtorph Didriksen aperivoq saarullinniarsinnaanermut akuersissutit Naalakkersuisut nutaat pilersereernerisa kingorna qassit tunniunneqarnersut.

Taakkunannga 108-t inunnut suliffeqarfinnulluunniit siornatigut saarullinniarnissamut akuersissutinik tunineqarsimanngitsunut tunniunneqarput.

- Akuersissutinik tunineqartut tassaapput Naalakkersuisut ivertinneqarnerinit, apriilip tallimaanniit 2013 ukioq maannamut apriilip arfineq pingajuannut, tunineqartut, Finn Karlsen oqarpoq.

Saarullittassat ilaneqassapput

 Saarullittassat ilaqqullugit qinnuteqartoqarpat, tamanna Naalakkersuisunit ilalerneqassaaq.

Saarullinnut pisassiissutit ukiuni kingullerni marlunni tamakkerlugit aalisarneqarneq ajorput.

- Sinerissap qanittuani saarullinnik aasaq manna suli amerlanernik aalisarusuttoqassappat, tamannalu paasinarsippat, amerlanernik pisassanik kissaateqartoqarpat Naalakkersuisunit ilalersuiumaarpugut, taama Finn Karlsen, saarulliit kingumut takkukkiartuinnarnerisa kingunerisaannik, saarulliit pisassat ilasinissamik Naalakkersuisut pilersaaruteqarnersut Inatsisartuni ilaasortap apeqqutaanut, akivoq.

Tamatumunnga tunngaviuvoq saarulliit ukiuni kingullerni marlunni tunineqartartut amerlanerulermata tunisallu angisuujunerulersimallutik. Ukioq manna naatsorsuutigineqarpoq saarulliit 2009-mi tukertut aalisarneqassasut, saarullilluarnissamut iluaqutaanissaat ilimanarluarluni.

- Naalakkersuisut aalisarnikkut illoqarfinni nunaqarfinnilu suliffissaqartitsiarneq qulakkeerusulluinnarpaat, Aalisarnermut, Piniarnermut Nunalerinermullu Naalakkersuisoq, Finn Karlsen erseqqissaavoq.