Silap pissusia pillugu Nalunaarut

Silap pissusia pillugu nalunaarut; nunani issittuni nunap inuii immikkut sunnertiasuupput.

 

Nunap inuiisa inooriaatsiminnik nalinginnaasumik ingerlatsiinnarsinnaanerisa, aammalu aallaaniarnikkut aalisarnikkullu imminnut pilersorsinnaanerisa silap pissusiata allannguutaannit ulorianartorsiortinneqarnerat annertusiartorpoq. Nalunaarusiami, nunani tamalaani silap pissusia pillugu oqallittartoqatigiit IPCC-p una sapaatip akunnera Japanimi saqqummiussaanni inerniliinerit nikallornartut ilaat taama nipeqarpoq.
Nunarsuarmioqatigiit ukiuni untritilikkaani atukkatsinni nunarsuup 2 gradinik kissannissaanik pinngitsoortitsinissaq iluatsinngippassuk, silap pissusiata allannguutaanut naleqqussarnissamut pisariaqartitsineq annertussasoq nalunaarusiami tikkuarneqarpoq.
”Sila taamatut annertutigisumik kissassappat, tamanna issittumi pinngortitap ataqatigiinneranut, pinngortitami isumalluutitsinnut, imermik tarajoqanngitsumik pissarsisinnaanitsinnut minnerunngitsumillu inuussutissaqarnitta isumannaassusaanut oqaatigineqarsinnaanngitsumik kingunerluuteqarujussuartussaavoq. Atuakkat annilaajallannartut. Kisiannili nuannaarutigaara, nalunaarusiami issittumi ilisimasagut aammalu silap pissusiata allannguutai tunngavigalugit unammilligassat akuersaarneqarmata”, Avatangiisinut Pinngortitamullu Naalakkersuisoq oqarpoq.
Nalunaarusiap imaa nikallornaraluartoq, saqqummiussinermi piffissap suliat, 2015-imi Parisimi nunarsuaq tamakkerlugu silap pissusianut isumaqatigiissusiornissamut aqqutissiuisussat pingaarutillit ingerlannerinut tapertaanera iluarisimaarnarpoq. FN-imi generalsekretærip septembarimi silap pissusia pillugu ataatsimeersuartitsinissaa suliami tassani naleqqat pingaarutillit ilagissavaat.
”Naluneqanngitsutut FN-ip generalsekretæriata Kalaallit Nunaata avannaanut tikeraarnera pingaarutilik naammasseqqammerparput, taassumalu inernerisaatut Ban Ki-moon-ip septembarip ulluisa 23-anni New Yorkimi silap pissusia pillugu ataatsimeersuarnermi Naalakkersuisut siulittaasuattut oqalugiartussanut pingaarnernut ilaanissannut qaaqquaanga. Nalunaarummi tassani oqariartuut, ataatsimeersuarnermi saqqummiukkusutarput taperserneqarpoq, tassalu Nunat Issittut inuiisa nipaasa nunani tamalaani silap pissusia pillugu isumaqatiginninniarnerni pingaaruteqarnerat. Nunat inuiisa oqaluttuarisaanermik ilisimasaqarnerisa, kinguaariit ingerlanerini ingerlasimasup pingaaruteqarnera nalunaarusiami uppernarsarneqarpoq.”, Naalakkersuisut siulittaasuat Aleqa Hammond oqarpoq.
Naleqqussaanissamik pisariaqartitsinermut nunarsuarmi gassinik silaannarmik kissakkiartortitsisartunik annikillititsinissap qanoq annertutigisumik iluatsissimanissaa apeqqutaasorujussuusussaasoq, nalunaarusiami inerniliissutaasut ilagaat. Kim Kielsen oqarpoq:
”Nunarsuarmioqatigiit – matumanilu pingaartumik nunat angisuunik suliffissuaqarfiusut eqqarsaatigaakka – gassinik silaannarmik kissakkiartortitsisartunik aniatitsinerminnut pilertortumik iliuuseqarpata annertuumillu killilersuilerpata, siunissami annertoorsuarmik nalorninartoqartinneqartunut naleqqussarnissatsinnut suliassagut ajornannginnerusussaapput. Naalakkersuisut naleqqussarnissamut suliniutinik siunnerfeqartunik suliaqareerput, taakkulu ingerlaqqissapput. Taamatuttaaq nammineerluta aniatitatsinnik ajornartinnagu killilersuiniarnermik suliaqarnerput ingerlateqqissavarput..”


Aleqa Hammond, Naalakkersuisut siulittaasuat.

Kim Kielsen, Avatangiisinut Pinngortitamullu Naalakkersuisoq


Annertunerusumik paasisaqarnermi attaveqarfissaq:
Pisortap tullia Michael Pedersen, Avatangiisinut Pinngortitamullu Naalakkersuisoqarfik, Mobil: +299 48 63 02