Peqqinnerit nittartakkakkut

Lancering Peqqik

Ataasinngorneq 17. martsimi peqqinnissaqarfik IT-p tungaatigut annertuumik alloriarpoq. Tamanna pivoq innuttaasunut sammisumik peqqinnissaq pillugu nittartakkap nutaap aamma peqqinnissaqarfik tamaat pillugu elektronikkikkut napparsimasunik misissoriikkanik allattuiffiup katersuuffiusup saqqummiunneqarnerisigut.

Meerara qaqugu akiuussutissamut kapineqassava? Inuusaasermut peqqinnarnerusumut sumi isumassarsissaanga? Peqqinnissaqarfimmut qanoq atassuteqassaanga? Apeqqutinut taakkununnga akissutit peqqinnissaq pillugu nittartakkami Peqqik.gl-imi, nutaamik iluseqarluni imaqarlunilu aallartinneqartumi nassaarisinnaavatit.

Peqqik.gl-ip saqqummiunneqarnera peqatigalugu Nuummi Dronning Ingridip Napparsimavissuani nakorsaatinik katsorsaavimmi elektronikkikkut napparsimasunik misissoriikkanik allattuiffik nutaaq saqqummiunneqarpoq. Kalaallit Nunaat tamakkerlugu atulersinnera ukiut tullii marluk ingerlanerini pissaaq. Manna tikillugu napparsimasut ataasiakkaat pillugit paasissutissat aaqqissuussinerni assigiinngitsuni arlalinni toqqorneqartarsimapput. Peqqinnissaqarfimmut tamarmut ataatsimoortumik elektronikkikkut napparsimasunik misissoriikkanik allattuiffeqarnikkut katsorsaasartut assigiinngitsut napparsimasoq pillugu paasissutissanut attuumassuteqartunut tamanut ajornanngitsumik pissarsisinnaalissapput.

-”Naalakkersuisut kissaatigaat internettimi peqqinneq aamma nappaatit pillugit paasissutissanik ujarlerneq kikkunnut tamanut ajornanngitsuussasoq. Peqqinnissaq pillugu nittartakkami nutaami peqqinnissaqarfiup neqeroorutai pillugit paasissutissat aamma illit uangalu peqqinnarnerusumik inuusaaseqalernissarput qanoq angusinnaanerlutigu paasissutissat ataatsimut katersorneqarput”, taamatut oqarpoq Peqqissutsimut Attaveqarnermullu Naalakkersuisoq Steen Lynge nangillunilu:

-”Nuannaarutigingaarpara ullumikkut elektronikkikkut napparsimasunik misissoriikkanik allattuiffik nutaaq atulersissinnaagakku. Siumut sammisumik innuttaasut pillugit peqqinnissaqarfiup paasissutissaatai ullutsinnut naleqquttumi atortumi toqqorneqarput, peqqinnissaqarfimmit tamarmit atorneqarsinnaallutik. Elektronikkikkut napparsimasunik misissoriikkanik allattuiffiup nutaap atulersinnerata kingunerisaanik napparsimasut malinnaavigineri annertunerusumik ataqatigiissinneqarpoq, tamatumalu napparsimasunut isumannaatsuuneq pitsaanerulersillugu”.

Siunissami ungasinnerusumi anguniagaq tassaavoq peqqinnissakkut nittartagaq aqqutigalugu elektronikkikkut napparsimasunik misissoriikkanik allattuiffimmiit paasissutissat ilinnut tunngasut aasinnaalissagitit. Tamannali suli siunissami ungasinnerusumiippoq.