Aquguk – aqunneqarnak

Sapaatip akunnera 18 tassaavoq nuna tamakkerlugu imigassap, imigassamik atueriaatsip imigassartoriaatsillu immikkut sammineqartarfia. Ukioq manna qulequtsiussaq tassaavoq ”Aquguk- aqunneqarnak”.

Aaqqissuussinissanut atatillugu sapaatip akunnera 18-imut atugassanik qinnuteqartoqarsinnaasimavoq. Peqqissutsimut Attaveqarnermullu Naalakkersuisup Steen Lynge-p aaqqissuussinernut atugassatut qinnuteqaatit, illoqarfinnit qulaaluaneersut nunaqarfinnit 26-ineersut ataaserlu savaateqarfimmeersoq akuersissutigai.
”Aquguk- aqunneqarnak” qulequtsiullugu sapaatip akunnera 18-imi - ataatsimoorfigut aallaavigalugit imigassamik atuineq pillugu - pitsaasumik oqaloqatigiinneq tunngavissiuunniarneqarpoq.

” Innuttaasut akornanni imigassamik atuivallaarnerup appartinneqarnissaa taamaasiornikkullu pingaartumik meeqqani, inuusuttuni ilaqutariinnilu inuunerup naleqarnerulersinnissaa anguniarlugu, atornerluineq pinaveersaarniarlugu suliniarnerup patajaallisartuarnissaa, Naalakkersuisut kissaatigaat. Sapaatip akunnera 18-imi iliuusissat assigiinngitsut, tamatuminnga qulakkeereqataasussat ilagaat”, taama oqarpoq Peqqissutsimut Attaveqarnermullu Naalakkersuisoq Steen Lynge imalu nangippoq:

”Ukiut ingerlanerini imigassartoriaatsip sammineqarnera imigassamik atuinermik appartitseqataavoq, imigassartoriaaserpulli suli ajornartorsiutaavoq. Meeqqat inuusuttullu inersimasut oqaasi malinnagit iliuusaannik issuaasarnerat tappiilliorfigeqqajaaneqarpoq. Meeqqat imigassap suunera, qanoq atorneqarsinnaanera inersimasullu imigassartorsimasut qanoq pissusilersortarnerat malugisarpaat.
Imigassartoriaatsip allanngortinnissaa kissaatigigutsigu, uagut inersimasut meeqqanut maligassiuisuussaagut. Angerlarsimaffimmi, illoqarfimmi, timersornerup silarsuaani, tusarnaartitsinerni nalliuttorsiornernilu inuttut ataatsimooqatigiinnermut atatillugu takunnissinnaanermut imigassamillu atuinerup allanngortinnissaanut tunngassuteqarpoq”.

Imigassaq Ikiaroornartorlu pillugit Siunnersuisoqatigiit siunnersuutaat pingasut ukioq mannattaaq sapaatip akunnerani 18 -imi tunngaviusut tassaapput:

  • Meeqqat inuusutullu 18-iliineqanngitsut imigassartunngilluinnartariaqarput.
  • Naartuguit-imigassartoqinak. Naartulernissat pilersaarutigigukku imigassartoqinak.
  • Imigassartornermi imertarfiit sisamat sinninngisaannakkit.