Kalaallit Nunaanni suliffeqarfinni tupatorunnaarnissamut siunnersortit

Suliffeqarfiit namminneq tupatorunnaarnissamut siunnersorteqalernissamut periarfissaqalerput. CSR Greenland Peqqissutsimut Attaveqarnermullu Naalakkersuisoqarfik suleqatigiillutik, sap. ak. 22-mi – sapaatip akunnera pujortarfiunngitsumi- tupatorunnaarnissamut siunnersortissanik pikkorissaanissaq pillugu Kræftimut Akiuiniaqatigiiffik isumaqatigiissusiorfigaat.

”Iliuuseqarfissap siulliup tupamut sammitinneqarnera nalaatsornerunngilaq. Tupatorneq Kalaallit Nunaanni innuttaasut peqqissusaannut navianartorsiortitsisut annersaasa ilagaat. Innuttaasut inersimasut 66 %-ii tupatortuupput tamannalu suliffinni, peqqinnissaqarfimmi inuiaqatigiinnilu nalinginnaasumik aningaasaqarnermut annertuumik sunniuteqarpoq”, taama oqarpoq Peqqissutsimut Attaveqarnermullu Naalakkersuisoq Steen Lynge.

Tamatuma saniatigut Naalakkersuisut innuttaasut peqqissuunissaat pillugu suliniutaanni Inuunerittami, tupatornermik pinaveersaartitsiniarneq ukioq 2014-imi iliuuseqarfissatut toqqarneqarpoq. Tamanna tunngavigalugu suleqatigiinnermi iliuusissatut siullertut tupatornerup qitiutinneqarnissaa pissusissamisoorluinnarpoq.

Pikkorissaaneq, suliffeqarfinnut tupatorneq iliuuseqarfiginiarlugu peqqinnarnerisunik ileqqoqalernissaannik siunnerfilimmik suliniuteqaqataarusuttunut saaffiginnippoq. Pikkorissaaneq sulisunut tamanut suleqatit tupatorunnaarnissaannut siunnersuinissamik soqutiginnittunut saaffiginnippoq. Tupatorunnaarneq siunnersuinerlu atuagarsornikkut sungiusarnikkullu Ilinniartitsissutaapput. Tamatuma peqatigisaanik sakkussanik tigussaasunik tupatortut tupatorunnaarnertik iluatsissappat atorsinnaasaannik ilisimasaqalersitsivoq.

” Pikkorissaaneq, suleqatigiinnissamik isumaqatigiissummi nutarterneqarlaami suliniutit piviusunngortut siullersaraat. Tigussaasunik iliuuseqalernikkut innuttaasut peqqissuunissaat pillugu suliniuteqarnerup ilusinikkiartuaalernera, Peqqissutsimut Attaveqarnermullu Naalakkersuisoqarfimmit CSR Greenland-imillu nuannaarutigineqarpoq”, Lotte Frank Kirkegaard, CSR Greenland-imi suliniutinik aqutsisoq oqarpoq.

Innuttaasut peqqissuunissaanik suliniuteqarnerup suleqatigiissutaanerata ineriartornera ilutigalugu, peqqinnissamut tunngasut allat sammineqartassapput.

Pikkorissarnerup imarisai peqataaniarlunilu nalunaarfissaq pillugu paasissutissat uani pissarsiassaapput.