Imarsiornermik Ilinniarnerit siuariartorluartut

Skipperskolen Nuuk 2013-imi ukiakkumiit Paamiuni tunngaviusumik Imarsiornermik Ilinniarfik aamma Nuummi angallatit naalagassaannik ilinniarfik ilinniartitsinermikkut pikkorissaasarnermikkullu siuariartorluarsimapput. Angallatit naalagassaattut ilinniartut aallarterlaat maanna 20-upput, apriilimilu ilaqqissallutik, tunngaviusumik ilinniarfimmi ikerinnakkut unittarnerit malunnaatilimmik ikileriarput, aamma inuutissarsiummik ingerlatsisut Imarsiornermik Ilinniarfik suleqatigalugu pikkorissarnissamut annertuneroqisunik periarfissaqalerput.

Taamatut ineriartorneq Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup Nick Nielsenip nuannaarutigaa, oqarlunilu:

“Politikkikkut tamatigoortumik isumaqatigiissutaavoq imarsiornermik inuutissarsiutini ilinniartitsineq annertusassagipput. Imarsiornermi suliffippassuit nunaqavissunik inuttalerneqarsinnaapput. Taamaammat nuannerluinnarpoq maanna takusinnaaleratsigu Imarsiornermik Ilinniarfik annertuumik siuariartortoq, uangalu Imarsiornermik Ilinniarfimmi siulersuisut, pisortat sulisullu ukiumi qaangiuttumi suliaat annertooq nersualaarusuppara”.

Ilutigisaanik Nick Nielsenip erseqqissarpaa, sumiiffinni ataasiakkaani inuutissarsiutinik ingerlatsisut suliaq tapersersortuassagaat ilimagigamiuk, attuumassuteqartut tamarmik akornanni qanimut suleqatigiinnissaq siumukartuarnissamut tunngaviummat.

“Imarsiornermik inuutissarsiutigalugu ingerlataqartut Imarsiornermik Ilinniarfiup siulersuisuini peqataatitaqarluarput. Taamatut inuutissarsiummut qanimut attaveqarneq ilinniartut, ilinniakkat pikkorissartarnerillu amerliartorluarnerinut pingaaruteqartumik pissutaaqataavoq. Soorunami aamma uanga naalakkersuisutut ilimagivara, imarsiornermik inuutissarsiuteqartut sulisussat kalaallit ilinniarluarsimasut aalaakkaasumillu sulisut ilinniareeraangata atorfinitsittarumaaraat, suliffissaaleqineq ilinniartitsineq aqqutigalugu annikillisarneqarsinnaaqqullugu”.