Nunatsinni aalisariutit avaleraasartoorniarnermi salliutinneqassapput

Aalisarnermut, Piniarnermut Nunalerinermullu Naalakkersuisup Finn Karlsenip Naalakkersuisunut Tunumi avaleraasanik aalisarnissami inassuteqaataa, tassaasoq aalisarnissamut qinnuteqaateqartut nunatsinni nammineq pigisaminnik angallataateqassasut, kiisalu nunatsinni umiarsuaatillit nammineq pigisaminnik angallamminnik pisaqarsinnaassusertik naapertorlugu pisassinneqarnissaannik inassutaa Naalakkersuisunit akuerineqarpoq 17. marts.

Finn Karlsen avaleraasartuunik 100.000 tonsinik aalisarnissamut qinnuteqartunut assigiinngitsunik pisassiinissamut pingaarnersiugaqarpoq.

Kalaallit aalisariutaataat avaleraasartuunik aalisassallutik qinnuteqartut salliutinneqassapput, umiarsuilluunniit aalisarnermi attartorneqartussat inuttaqanngitsut, nunatsinneersunit inuttalersinnaavaat. Taakku aalisarsinnaasaat naapertorlugit pisassinneqassapput.

Avaleraasartuunik aalisassallutik qinnuteqartut salliutinneqartut tulleraat kilisaataatillit avaleraasartuunik aalisariutiminnik aalisartitsisut aalisariutinik attartorlutik aalisartitsisinnaanerat. Aalisariutip aalisarsinnaassusia naapertorlugu pisassinneqassalluni.

Avaleraasartuunik aalisarnissamut salliutinneqartut pingajui tassaapput:
Ingerlatseqatigiiffiit tassaassasut nalunaarsorneqarsimasut piginnittuunerminnut aalisarneq pillugu inatsimmi aalajangersakkanik naammassinnissimasut.
Ingerlatseqatigiiffik tassaassanngitsoq "akunnermiliuttulerluni suliffeqarfimmik" taaneqartartoq.

Kilisaataatillit aalisariutinik attartortut attartugaata aalisarsinnaassusia naapertorlugu pisassinneqassapput. Aalisariutinik attartornermi isumaqatigiissutit assingi Naalakkersuisoqarfimmut nassiunneqassapput, soorlu aamma akitsuummut akiliutigineqartussaq aningaaserivimmit qulakkeerneqarsimassasoq.