Avaleraasartooqassuseq pitsaasumik misissuiffigineqassaaq

Aalisarnermut, Piniarnermut Nunalerinermullu Naalakkersuisoq Finn Karlsen Tunumi avaleraasartooqassutsip misissuiffigineqarnissaanut 2 million koruuninik qinnuteqarpoq.

Misissuinikkut uppernarsarneqassaaq tamanna qanoq amerlatigisunik qanorlu annertugisumi avaleraasartooqarnersoq.

- Misissuinerit inerneri atuassallugit pissanganartorujussuuvoq. Tunummi imartaa annertoorujussuaq ukioq manna misissuiffiginiarneqarpoq, siornatigut misissuisarnernit annerujussuarmik misissuisoqartussaalluni, Finn Karlsen oqarpoq.

Avaleraasartuunik misileraalluni 2011-mili aalisartoqalerpoq. 54.000 tonsit siorna aalisarneqarput, ukioq manna 100.000 tonsit aalisarneqassallutik.

- Avaleraasartuunik aalisarneq nunatsinni nutaajoqimmat, ukioq manna pitsaasumik misissuinissarput pingaartilluinnarparput, Finn Karlsen erseqqissaavoq.

Sumiiffiup ilamininnguani siorna misissuisoqarpoq.

- Misissuinerup takutippaa imartatsinni avaleraasartooqarluartoq, Finn Karlsen oqarpoq.
Misissueriaatsit assigiinngitsut ukioq manna marluk peqataaffigineqassapput. Misileraanissamut pisassiissutigineqarsimasut Pinngortitaleriffimmit immikkut piumasaqaatitalerneqarsimasut aalisarneqassallutik. Nunat avannarlerneersut aaqqissuussamik peqassutsimut misissuinerinut aamma peqataasoqassalluni.

- Avaleraasartuut amerlassusii pillugit allat pinngitsoorata soorunalimi suleqatigisussaallutigit ilisimaqqissaarparput, Finn Karlsen oqarpoq. Naalakkersuisunilu ilaasortap erseqqissarpaa nunatta aamma aalisakkanik ikeriinnarsiortunik, soorlu avaleraasartuunik, aalisarnissamut aamma ineriartortitseqataasariaqartoq.