Killilersorniarsarivaatigut

Finn K 1

Finn Karlsen avaleraasartuut pillugit isumaqatigiissuteqartunut: Killilersorniarsarivaatigut

- Nunat sineriallit ukiuni arlaqalersuni isumaqatigiissinnaasarsimanatik isumaqatigiissummik atsiorsimanerat immini ajunngikkaluartoq, taamaattoq narrutsassimassutigeqaara kalaallit aalisarnerat akornusersorniarsarimmassuk, taama Finn Karlsen EU-p, Norgep Savalimmiullu avaleraasartuut pillugit marsip 12-anni isumaqatigiissutaat pillugu oqarpoq.

Aalisarnermut, Piniarnermut Nunalerinermullu Naalakkersuisoq erseqqissaavoq EU, Norge Savalimmiullu isumaqatigiissutigimmassuk aalisariutit Kalaallit Nunaanneersut avaleraasartuunik aalisarnissaasa periarfissaannik killilersuiniartoqassasoq.

- Isumaqatigissutaasali Kalaallit Nunaata avaleraasartuunik aalisarnera tunngaviusumik eqqussanngilaa, isumaqatigiissuteqartut aalisariutaataat Kalaallit Nunaanni avaleraasartoorniarnermi maannamut aalisaqataasimanngimmata.

- Isumaqatigiissutigineqartoq isumaqatigiissuteqartunut oqaloqatigiissutigineqarnissaa pillugu saqqummiutissavaa. Naatsorsuutigaara Atlantikup avannaani aalisarnermut naalakkersuisoqatima tunngavigisarput paasillugulu tatigiumaaraannga, Finn Karlsen erseqqissaavoq.

Avaleraasartuut pillugit nunat sineriallit nunatta piffissami sivisuumi attaveqarfigisarsimavai. 2013-imilu iluatsilluartumik avaleraasartoorniareernerup kingorna avaleraasartuut pillugit isumaqatiginninniarnerni nunarput alaatsinaattutut peqataavoq.

- Avaleraasartuunik aalisarnerput ineriartortileruttorparput, taamaattoq nunatta imartaani qanoq amerlatigisunik avaleraasartooqarnersoq ilisimanngilarput. Aalisarnermik ineriartortitsinitsinnut atatillugu Pinngortitaleriffik avaleraasartooqassutsimik misissuissaaq. Peqassutsimut paasissutissanik peqarluartariaqarpugut Kalaallit Nunaata avaleraasartuunik pisassinneqartarnissaanut isumaqatiginniutaasinnaasunik, Finn Karlsen oqarpoq.

Kalaallit Nunaanni avaleraasartuunik aalisarneq ineriartortinneqaleruttorpoq, nunap inatsisai tunngavigalugit ineriartortinneqarluni, soorlu nunat tamat akornanni aalisarneq pillugu inatsisit aamma tunngavigineqartut.

- Ukiuni arlaqalersuni maluginiartarsimavarput pinngortitami ataqatigiinnerup ilaa allanngoriartortoq. Assersuutigalugu Tunumi imaq ukiuni kingullerni qulikkaani kissatsikkiartortoq. Tamatuma kingunerisaanik aalisakkat nutaat Kalaallit Nunaata imartaanut takkussuuttalerput, pisuussutillu tamakku nutaat iluaqutigineqarnissaat soorunami soqutigisaraarput, Aalisarnermut, Piniarnermut Nunalerinermullu Naalakkersuisoq oqarpoq.

Kalaallit Nunaata avaleraasartuunik misileraalluni aalisarnermi tunngaviusumik suliassaasa ilaat tassaavoq Tunup imartaani avaleraqassutsimik 2014-mi aamma misissuititsinissaq.