Aningaasaliissutinik agguaassineq

Penge

Kulturikkut aningaasaliissutinik aammalu Tipsernermit Lottornermillu aningaasaliissutinik agguaassineq

Qinnuteqarnissamut killigititaq 15. februaarimut atatillugu Namminersorlutik Oqartussat Kulturimut Aningaasaliissutaannit aammalu Tipsernermit Lottornermiillu tamanut iluaqutissanngortitassanik siunertalinnut aningaasanik Kultureqarnermut Naalakkersuisoq Nick Nielsen agguaavoq, tunngavigineqarpoq Naalakkersuisut eqqumiitsuliornermut piorsarsimassutsimullu periusissiaat naleqartitanut tallimanut sammitinneqartoq: ilikkagaqartarneq, nutaaliorneq, imminut nappassinnaaneq, oqallitsitsilerneq, ataatsimoorneq.

Tipsernermit Lottornermiillu aningaasat projektit 38-it taperneqarput. Agguaaneqartuniit 3.1 millionit kr.-nit Nunatta Isiginnaartitsisarfiata projektiinut qulingiluaasunut tunniunneqarput.

Naalakkersuisoq Nick Nielsen tamanna pillugu imannak oqaaseqarpoq:

“Nuanaarutigaara Nunatta Isiginnaartitsisarfiata projektinut qinnuteqarsinnaanerit periarfissarititaasut atorsimammagit, taamaalilluni Nunatta Isiginnaartitsisarfia isiginnaagassianik suliaqarnini ingerlateqqissinnaalermagit. Qinnuteqaatit nalilersorneranni immikkut maluginiarsimavara Nunatta Isiginaartitisarfia annertunerusumik pilersaarusiorsimammat sinerissami isiginnaartitsisarniarluni, taamaalilluni Nunatta Isiginnaartitsisarfiata suliai nuna tamakkerlugu nuannaarutaasinaalerlutik”.

Namminersorlutik Oqartussat Kulturimut Aningaasaliissutai pingaarnertut qinnuteqaateqarfigineqarsinnaapput eqqumiitsuliortunut pinngorartsitsisunut ingerlatitsisunullu. Tassani qinnuteqaatit 23-it katillugit 1.2 mio kr.-nik taperneqarput.

Assersuutitut suliniutit ukua taaneqarsinnaapput:

  • “Nunatsinni Nipilersortartut” pissarsitinneqarput ilaasortat pikkorissarnissaannut, tapiissutip qulakkeerpaa nipilersortartut siunissami digitalimi teknikkip periarfissarititai ilisimallualissagaat.
  • Eqqumiitsuliortoq Isle Hessner taperneqarpoq ilusilersukkamik sananissaminnut ” Piniartut nuliaannut ataqqinaat”. Isle eqqumiituliortuuvoq nutaaliortoq pikkorissoq, immikkuullarissutigalugu saviminermik suliaqartarnini.
  • “Utoqqaat Kattuffiat” ataatsimoornissaminnut taperneqarpoq, taamaalilluni qulakkeerneqarpoq utoqqaat atugarisatik pillugu oqallissinnaanerat, inuiaqatigiinnullu oqalliseqataalluarsinnaalerlutik.
  • Kulturikkut illorsuaq Taseralik Qaanaarmiut peqatigalugit pilersaarusiorsimavoq kulturikkut paarlaaseqatigiinnissamik, taamatut aamma suleqatigiit “Greenland Spirit” aamma taperneqarput kalaallit kulturiannik Japanimi saqqummiinissaminnut.

Nick Nielsen agguaassinermut atatillugu oqaatigaa:

”Isumaqarpunga tapiisutit agguaaneqartut takutikkaa kulturitta qanoq assigiinngisitaartiginera uppernarsarlugulu pikkorissunik piumassuseqarluartunillu inoqartoq, eqqumiitsuliornikkut, kulturillu ingerlaqqinnissaanik aammalu nutaanngorsaarnissaanik suliniutillit. Nuannaarutigaara piumassuseqarluartoqarmat nunaqqatigiit akornanni, nuanneqaaq iliuuseriniakkanut tapeqataasinnaagatta.”