Aalisarneq pillugu isumasioqatigiinnermut

Tusagassiorfinnut aalisarneq pillugu isumasioqatigiinnermut qaaqqusissut

Aalisarnermut, Piniarnermut Nunalerinermullu Naalakkersuisoqarfiup tusagassiorfiit aalisarneq pillugu ulluni marlunni, pingasunngornermi apriilip 2-anni, sisamanngornermilu apriilip 3-anni isumasioqatigiinnissamut najuunnissaannut tikilluaqquai.

Isumasioqatigiinneq Hotel Hans Egedep ataatsimiittarfissuani pissaaq.

Tusagassiortut ataatsimiittarfissuarmi saqqummiussat oqallinnerillu tamaasa najuuffigisinnaavaat.

Aalisarneq pillugu isumasioqatigiinnermi siunertarineqarpoq nunatsinni aalisarnermi unammilligassat suussusersineqarlutillu eqqartorneqarnissaat kiisalu aalisarnerup aningaasarsiornikkut peqassuserlu eqqarsaatigalugit attanneqarsinnaasumik ingerlanneqartariaqarneranut sinaakkutissanik naleqqussaasariaqarnissamik eqqartuinissaq. Isumasioqatigiinneq pingasunngorpat nalunaaqutaq 8.30 ammassaaq.

Isumasioqatigiinneq Aalisarnermut, Piniarnermut Nunalerinermullu Naalakkersuisumit, Finn Karlsenimit, ammarneqassaaq.

Isumasioqatigiinneq Aalisarnermut, Piniarnermut Nunalerinermullu Naalakkersuisoqarfimmit KNAPK aamma Kalaallit Nunaanni Sulisitsisut Peqatigiiffiat suleqatigalugit aaqqissuunneqarpoq.

Isumasioqatigiinnermi inuit 140-it missaaniittut peqataassapput, amerlanerit aalisartuullutik, aalisarnermullu attuumassuteqartuullutik. Isumasioqataasussat ilaat aamma tassaapput naalakkersuinermik suliallit atorfilittallu.

Programmi uani takuneqarsinnaavoq.