Isumasioqatigiinneq

Nunatsinni innarluutillit unammilligassaat, pisariaqartitaat siunissamilu periarfissaat pillugit isumasioqatigiinneq, ulloq 26. marts 2014, Hotel Hans Egede-mi, Nuuk.

Ilaqutariinnermut Inatsisinillu Atuutitsinermut Naalakkersuisoqarfiup angajoqqaat peqatigiiffiat INOOQAT peqatigalugu imatut qulequtserneqarsimasumik aaqqissuussisimapput: ”Nunatsinni innarluutillit unammilligassaat, pisariaqartitaat siuniissamilu periarfissaat pillugit isumasioqatigiinneq”. Tamatumani aallaavigineqassapput meeqqat inuusuttuaqqallu innarluuteqartut taakkulu ilaqutaasa atugarisaat.

Isumasioqatigiissitsinermut aallaaviuvoq Naalakkersuisoqarfiup danmark-imi kattuffimmik LEV-imik aammalu angajoqaat peqatigiiffiannik INOOQAT-mik 2013-miilli suleqateqarneranik.

Isumasioqatigiinnermi innarluutilinnut tunngatillugu pissanganartunik saqqummiussisoqartarumaarpoq, INOOQAT-llu qanittukkut misissuititsisimaneranit qulequtalerlugu: ”Nunatsinni meeqqamut, inuusuttuaqqamut inerisimasumulluunniit innarluutilimmut angajoqqaajulluni ulluinnarni misigisat qanoq ittuuppat?”. Isumasioqatigiinneq naggaserlugu peqataasut naliliiffigiumaarpaat nunatsinni innarluutilinnik inooqateqarnitsinni unammilligassat pingaarnerit arfinillit suunersut.

Isumasioqatigiinnermi peqataassapput naalakkersuinikkut suliaqartut, innarluutilinnik sullissisut aammalu INOOQAT-mi sunngiffimminni suleqataasartut.

Pilersaarusiaq

Nunatsinni innarluutillit unammilligassaat, pisariaqartitaat siunissamilu periarfissaat