Qaleralittassat ilaneqarput

Aqutsiveqarfimmi Upernavimmi qaleralittassat ilaneqarput

Aalisarnermut, Piniarnermut Nunalerinermullu Naalakkersuisup, Finn Karlsenip, Naalakkersuisunut inassuteqaataa, aqutsiveqarfimmi Upernavimmi umiatsiaararsortunut qaleralittassiissutigineqartut 500 tonsinik amerlineqarnissaat, Naalakkersuisunit ullumi akuerineqarpoq.

Ilassutit marsimut ukioq manna pisassiissutigineqartut 200 tonsinik nuunneqarlutik.

Naalakkersuisut aamma akueraat Aalisarnermut, Piniarnermut Nunalerinermullu Naalakkersuisoq piginnaatinneqassasoq ilassutigineqartut, sinneruttut 300 tonsit pillugit allaffissornikkut agguaaseqqinnissaanut suliaqarsinnaassasoq.

300 tonsit qaammatini apriilimiit ukiup sinneranut maannamut qaammatikkuutaartumik pisassiissutigineqartut nungukkaangata aalisarneqarsinnaasussanngorlugit.

- Naalakkersuisunit kissaatigaarput pisassiissutigineqartut tamakkiisumik innuttaasunit atorluarneqartarnissaat, taamaattumik Naalakkersuisut aalajangerput 2013-mi pisarinngitsuukkat 500 tonsit pisassanngortissallugit, sumiiffimmi pineqartumi ataavartumik aalisartoqalersinnaasunngorlugu, Finn Karlsen oqarpoq.

Aqutsiveqarfimmi Upernavimmi 7.950 tonsit 2013-mi qaleralittassiissutigineqarput. Taakkunanit 1.911 tonsit sinnerupput – aalisarneqanngillat.