Ineqarnikkut inissisimaneq pillugu ataatsimeeqatigiipput

Iluarsartuussineq, isaterineq aammalu nutaanik sanaartorneq sammineqarput

Ataasinngornermi 31. marts 2014 Kommuneqarfik Sermersuumi Borgmesteri Asii Chemnitz Narup aammalu Ineqarnermut Naalakkersuisoq Siverth K. Heilmann Kommunip ineqarnikkut inissisimanera pillugu ataatsimeeqatigiipput.

Ataatsimeeqatigiinnerup malitsigisaanik isumaqatigiissutigineqarpoq Nuummi inissiat 1980-ikkut ingerlaneranni sanaartorneqarsimasut ilaasa qaliaasa, igalaavisa aammalu silataatungaasa iluarsartuunneqarnissaat Namminersornerullutik Oqartussat tungaannit siuarsarneqassasut, tamatumalu saniatigut inissiat tamatigoortut Nuummi Qinngutsinni sanaartorneqassasut. Isumaqatigiissutigineqartut taakku saniatigut isumaqatigiissutigineqarpoq, Paamiuni inissiarsuatoqarsuit qaqortut isaterneqartussat pillugit Namminersorlutik Oqartussat pilersaarusiorlutik aallartissasut, tamatuma qulakkiissavaa isaterinerup aallartinneqarnissaa. Kiisalu isumaqatigiissutaavoq Namminersorlutik Oqartussat isumagissagaat Tasiilami inissiat affarleriiaat misileraalluni iluarsartuunneqarnerisa ingerlanneqarnissaat.

- Nuannaarutigaara Kommuneqarfik Sermersuup Borgmesteria Asii Chemnitz Narup ataatsimeeqatigigakku, Ineqarnermut Naalakkersuisoq Siverth K. Heilmann oqarpoq. Siunissaq eqqarsaatigalugu suleqatigiinneq pitsaasoq aallarteriigarput suli annerusumik inerisassallugu pisariaqarpoq, tamannalu pissaaq oqaloqatigiinnivut paaseqatigiiffiulluartut nanginnerisigut. Isumaqatigiissutaavoq Siunnerfilimmik suleqatigiinnissaq aammalu inissiat pitsaanerusut, akikinnerusut pilertornerusumik naammassineqarsinnaasut nunatsinni siunnerfigineqassasut isumaqatigiissutaavoq.

- Kommuneqarfik Sermersuumi inissaqarniarneq inissialiortiternerlu suleqatigiissutigisinnaagatsigit nuannaarutissaavoq, borgmesteri Asii Chemnitz Narup oqarpoq. Oqaloqatigiinnerit suleqatigiinnerlu maanna aallartinneqartut pitsaasutut isigaavut, aammalu Kommuneqarfik Sermersuumi inissianik iluarsartuussinissamik pisariaqartitsineq isiginiarneqarmat nuannaarutigalutigu. Tamarmiulluta isumaqatigiissutigaarput Nunatsinni inissialiortiteriaaseq pitsaanerusoq akikinnerusorlu siuarsarneqassasoq, aamma Kommuneqarfik Sermersuumi.

- Ineqarnermut Naalakkersuisoq Siverth K. Heilmann nangilluni oqarpoq, pingaaruteqartuusoq aningaasanut inatsisip periarfissarititaasa iluini pilersaarusianik eqaatsumik aaqqissuussisinnaaneq. Pingaaruteqarpoq inissiat pisariaqartinneqartut ukiuni aggersuni Kommunit peqatigalugit sanaartortinneqartarnissaat. Taamaammat naammagisimaarpara inissiat attartortittakkat ”tamatigoortut” nutaat 96-it Nuummi Qinngutsinni sanaartorneqarnissaasa siuarsarneqarnissaanik neqeroorutiga Kommuneqarfik Sermersuumit tigulluarneqarmat. Anguniagaavoq sanaartugassat immikkoortunut marlunnut avillugit ingerlanneqassasut, tassa ukioq manna inissiat 48-it sanaartorlugit aallartinneqassapput aappaagulu inissiat sinneri 48-it sanaartorneqassallutik.

- Borgmesterip Asii Chemnitz Narupip uppernarsarpaa Kommuneqarfik Sermersooq tapiliussamik kommunimut pilersaarummik suliaqassasoq, taamaalilluni Qinngorpumi inissianik 96-inik sanaartorneq 2014-imi aallartinneqareersinnaaniassammat. Inissiat amerlinissaat, tamatumunngalu atatillugu sanaartornikkut suliallit suliassaqarnerulernissaat nuannaarutigisorujussuuarput, borgmesteri oqarpoq.

Inissiat tamatigoortut taakku quleriiaajussapput aqqaneq marlukkaanik inissiartallit, inissiallu taakku assigiinngitsunik angissuseqassapput, inissiat pingasut marlunnik initaqassapput 50 m² missaannik angissuseqarlutik, inissiat arfinillit pingasunik initaqassapput 61 m² missannik angissuseqarlutik aammalu inissiat pingasut sisamanik initaqassapput 77 m² missaanni angissuseqassallutik. Pilersaarutit malillugit aamma Qaqortumi, Sisimiuni Ilulissanilu inissianik taamaattunik kingusinnerusukkut sanaartortoqartussaavoq. Tamatumalu saniatigut Qaqrtumi, Narsami, Maniitsumi aammalu Sisimiuni inissiat isatigassat pilersaarusiorlutik aallartinneqarsimalereerput.

- Nunatsinnut pingaaruteqarpoq, ataatsimoorluta suleqatigiillutalu sanaartornikkut suliassat ingerlanneqarnissaat isumannaassallugu, Ineqarnermut Naalakkersuisoq Siverth K. Heilmann oqarpoq.