Qasigiannguarmiut ataatsimeeqataalluarput

Finn i Qasigiannguit

Aalisarnermut, Piniarnermut Nunalerinermullu Naalakkersuisup Finn Karlsenip iluarisimaarluinnarpaa Qasigiannguani innuttaasut amerlasuut Villads Villadsenip efterskolianut ippassaq unnukkut ataatsimiigiarmata.

Naalakkersuisuni ilaasortat pingasut innuttaasunik ataatsimiititsinissamik qaaqqusisuupput. Naalakkersuisut allat marluk tassaallutik Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq, Nick Nielsen, aamma Inuussutissarsiornermut Aatsitassanullu Naalakkersuisoq, Jens-Erik Kirkegaard.

- Innuttaasut 100-it missaanniittut takkupput, tamannalu iluarisimaarpara, Finn Karlsen oqarpoq, oqaatigalugulu ataatsimeeqataasunit aalisarneq pillugu annerusumik apersuisoqanngitsoq.
Innutaasunik ataatsimiittoqareermat Qasigiannguani KNAPK-ip immikkoortortaani ilaasortat qulingiluat ataatsimeeqatigai.

- Ilaasortat Qasigiannguit kujataanni, Naternami, ukiuunerani umimmanniartoqarsinnaaneranik misissuititserusupput, Nuummullu periaruma tamanna periarfissaqarnersoq misissortissavara, Finn Karlsen oqarpoq.
Aalisarnermut, Piniarnermut Nunalerinermullu Naalakkersuisoq ataatsimeeqataasunut ilisimatitsivoq inuusuttut maannakkut aalisarsinnaanermut akuersissummik peqanngitsut akuersissummik siunissami tunineqartarsinnaanerinik naalakkersuisoqarfik maannakkut misissuisoq.

Finn Karlsenip Royal Greenlandip fabrikkia Halibut Greenlandilu ullumi aamma pulaarpai.

Ilulissani innuttaasunut ataatsimiisitsineq Sermermiuni unnugu nalunaaqutaq 19.30 pissaaq.