Ilulissani innuttaasunik ataatsimiitsitsineq

Borgermøde Ilulissat

Ilulissani innuttaasunik ataatsimiitsitsineq soqutigineqarluarpoq

Naalakkersuisut Ilulissani innuttaasunik Sermermiuni ippassaq unnukkut ataatsimiisitsimmata inuit 120-it missaanniittut najuupput. Najuuttut Naalakkersuisuini ilaasortat qulequttatut saqqummiussaat tassaasoq toqqissisimasumik inuuneq atugarissaarnerlu oqaluuserineqarput. Ataatsimiinnermilu oqaluuserineqartut tassaallutik: ilinniartitaaneq, inuussutissarsiutinik ineriartortitsineq, takornariaqarneq, aatsitassanik aamma piniarneq aalisarnerlu.

Finn Karlsen oqaluttuarpoq Naalakkersuisooqatigiit aalisarneq pillugu politikkiannik saqqummiussereernermi kingorna amerlasuunik apeqqutilliisoqanngitsoq.

- Ilaanniilli aperisoqarpoq inuusuttut aalisartunngorusukkaluarlutik aalisarsinnaanermut maannamut akuersissuteqanngitsut pillugit maannamut politikkerput qanoq innersoq, Finn Karlsen oqarpoq.

-Akivunga inuusuttut maannakkut aalisarsinnaanermut akuersissummik peqanngitsut akuersissummik siunissami tunineqartarsinnaanerinik naalakkersuisoqarfik maannakkut misissuisoq, Aalisarnermut, Piniarnermut Nunalerinermullu Naalakkersuisoq erseqqissaavoq.

Finn Karlsenip tunitsivinnut Royal Greenlandimut Halibut Greenlandimullu ullaap tungaani pulaarpoq, taakkunani ukiup imaalinerani tunisassiarineqartartut pillugit nassuiaanneqarluni.

Naalakkersuisuni ilaasortat pingasut Qaasuitsup Kommuniata borgmesterianik Ole Dorphimik kommunip allaffiani ualikkut ilassinnipput. Finn Karlsenip Naalakkersuisooqatai tassaasut Jens-Erik Kirkegaard, Inuussutissarsiornermut Aatsitassanullu Naalakkersuisoq aamma Nick Nielsen, Ilinniartitaanermut, Ilageeqarnermut, Kultureqarnermut Naligiisitaanermullu Naalakkersuisoq ilassinneqataapput.

Aasianni innuttaasunut ataatsimiisitsineq Ilinniarnertuunngorniarfimmi unnugu nalunaaqutaq 19.30 aallartissaaq.