Arctic Summitip 2014-imi ataatsimeersuarnerani oqalugiaat

Aleqa Arctic Summit

Naalakkersuisut Siulittaasuat Aleqa Hammond Londonimi Arctic Summitip 2014-imi ataatsimeersuarnerani oqalugiartunut pingaarnernut ilaavoq

Naalakkersuisut Siulittaasuat The Economistip ulloq ataaseq Londonimi Arctic Summit 2014-imi ataatsimeersuarnerani oqalugiartunut pingaarnernut ilaavoq.

Naalakkersuisut Siulittaasuata oqalugiarnermini qitiuppai, Kalaallit Nunaata silap allanngorneranut aningaasaqarnikkullu ineriartornerup Kalaallit Nunaata aatsitassaqarnikkut pilersaarutaanut tunngatillugu unammilligassai.

Naalakkersuisut Siulittaasuata Europamiut aningaasaliisartut Kalaallit Nunaanni aatsitassarsiornissamut aningaasaliinissaasa pingaaruteqarnerat erseqqissarpaa, kiisalu Naalakkersuisut pingaartikkaat, Kalaallit Nunaanni aningaasaliiniartut tamarmik Kalaallit Nunaanni avatangiisinik pisuussutinillu uumassuseqartunik pingaartitsinissaat.

Oqalugiaammi aamma pingaartinneqarpoq, nunat tamalaat akornanni suleqatigiinnerup nukittorsarnissaa, ajutoornerit pinaveersaartinnissaat kiisalu uuliamik aatsitassanillu Kalaallit Nunaanni tunisassiorneq aallartippat ingammik immami avatangiisit illersorneqarnissaat.

Oqalugiarnermi naggasiutigineqarpoq, nunat allat – taakkununnga ilanngullugit Issittumi Siunnersuisoqatigiinni alaatsinaatsut – Issittumi pitsaasumik ineriartornissamut peqataasinnaanerat, kisiannili Issittumi innuttaasut tassaasariaqartut Issittumi ineriartornermik attanneqarsinnaasumik oqaluuserisassanik nassuiaasartussat.

Oqalugiaat uani atuarneqarsinnaavoq

Ataatsimeersuarnermi Kalaallit Nunaat tusagassiortunit soqutigineqaqaaq Naalakkersuisullu Siulittaasuat tusagassiortunit nunanit tamalaaneersunit annertoorujussuarmik soqutigineqarpoq. Tusagassiorfiit arlallit apersuipput, taakkununnga ilanngullutik BBCs HardTalk aamma Financial Times.

The Economist tassaavoq aviisi nunani tamalaani tusaamaneqarluartoq, Arctic Summit 2014-imilu Issittumik sammisaqartut katersorniarneqarsimapput kiisalu ilisimatusartunit, kattuffinnik politikkikkut qilersorsimanngitsunit avatangiisinik suliaqartunik, uuliamik gassimillu tunisassiortunit, aningaasaliisartunit aningaaserivinnillu peqataaffigineqarluni.

Ataatsimeersuarneq, ataatsimeersuarnerup imaa peqataasullu uani takuneqarsinnaapput: http://www.economistinsights.com/sustainability-resources/event/arctic-summit-2014

Oqalugiartut allat tassaapput Islandip Nunanut Allanut Ministeria, Kunngeqarfiup Danmarkip Issittumi Aallartitaa, Hans Kristian Olsen Nunaoil A/S-imeersoq, Graeme Hossie, Londond Miningimeersoq kiisalu aqutsitut allat inuussutissarsiortuneersut, assartuisuneersut kiisalu kattuffinnit politikkikkut pitussorsimanngitsuneersut.

Naalakkersuisut Siulittaasuata Londonimiinnermini British Virgin Islandsip – maanna Nunat Nunasiaasimasut (nunat OLT-mik taaneqartartut) EU-mi suleqatigiinneranni siulittaasuuffimmik tigumminnittup sinniisaa ataatsimeeqatigaa. Ataatsimeeqatigiinnermi siulittaasuuffimmi pingaarnersiugassat kiisalu Kalaallit Nunaata piffissami aggersumi OLT-mi suleqatigiinnermi kissaatai eqqartorneqarput.