Asii Chemnitz Narup-imut akissuteqaat

Siverth: Asii puigorpiuk 2013-imi novembarip 5-iani Ineqarnermut Naalakkersuisunngortunga?

Kommuneqarfik Sermersuup borgmesteria Asii Chemnitz Narup tusagassiorfinnut nalunaarutaa tunngavigalugu Ineqarnermut Naalakkersuisoq Siverth K. Heilmann oqarpoq:

- Nuannaarutigalugu paasivara, Namminersorlutik Oqartussat 2009-miit ulloq manna tikillugu Nuummi inissiat 768-it sananeqarnerinut suleqataasimammat, aammalu inissiat suli 81-it sananeqarmata, tassalu inissiat kommunimit aningaasaleeqataaffigineqanngitsut katillugit 849-upput. Piffissami tassani Namminersorlutik Oqartussat Qaqortumi inissiat 12-it, Sisimiuni inissiat 36-it aamma Ilulissani inissiat 24-t Namminersorlutik Oqartussanit sanaartorneqarlutik aallartinneqarput. Tamanna tunngavigalugu ersarilluinnartumik oqaatigissavara, Naalakkersuisut Nuuk puigorsimanngimmassuk, tamatumalu saniatigut Naalakkersuisoqarfiga 2015-imi siunissamilu sanaartugassatut kissaatinik kommuninit pissarsiniarluni katersillunilu aallarteruttorpoq.

Ineqarnermi sanaartornermut aningaasaliissutit atorneqarnissaanni 2015 aallartiffigalugu Namminersorlutik Oqartussat inissiaataat salliutinneqassapput, tassalu taartissanik sanaartornikkut, inissianik aserfallassimasunik isaterinikkut kiisalu inissianik pitsaanerusunik iluarsaassinikkut illoqarfinnik nutarterinermut atorneqassallutik.

Suliassat illoqarfinni sapinngisamik amerlanerpaani ingerlanneqassapput.

Tamatuma aamma peqatigisaanik Nunap Karsia piffissami tassani kommunit inissiaataannik attartortittakkanik sanaartornermut kommuninut tapiissuteqarnissamut periarfissaqartussaanngilaq.

Namminersorlutik Oqartussat ineqarnermi anguniakkat arlallit suliaraat, taakkununngalu qitiusumik sanaartornermut aningaasaliissutissat pillugit, aammalu ineqarnermut pilersaarut, piffissaq qinigaaffiusoq qaangerlugu atuuttussaq politikkikkut annertuumik isumaqatigiinnissaq ilaatinneqarput. Tamanna anguneqassappat Inatsisartuni partiit annertuumik tapersiisariaqarput, tamannalu suliassaqarfiup patajaatsumik isumannaatsumillu ineriartorneranik kinguneqassaaq.

- Inissianik attartortittakkanik, inissiatut tamalaanit atorneqarsinnaasutut taaneqartunik, akissaatikinnerusut attartornermut akilersinnaasaanik sanaatortoqarnissaanik pilersaarusiortitsillunga aallartitsivunga. Tassalu tassani inissianik mikisunik, soorlu inissianik marlunnik initalinnik, 35 m2-nik angissusilinnik, inissianik pingasunik initalinnik 50 m2-inik aamma inissianik sisamanik initalinnik 65 m2-inik sanaartornissaq annertunerusumik pineqarpoq. Ilinniagaqartut, ilaqutariit inuusuttut pensionistillu akissarsiakitsut inissiami angisuumi najugaqaratik mikisumi najugaqarnissartik oqinnerutittussaavaat, Ineqarnermut Naalakkersuisoq Siverth K. Heilmann naggasiilluni oqarpoq.

Pisortat inissialiortiternerani sulisussat suliassaq malillugu nuttarsinnaannerannut nukittorsaataallunilu tapertaassaaq, tamatumalu peqatigisaanik kikkut tamarmik – sumiluunniit najugaqaraluarunik – pitsaasumik inissaqarnissaannut iluaqutaassalluni.

Siunissami ungasinnerusumi inuussutissarsiornermi periarfissat inissiallu piumaneqar-nerat eqqoriassallugu ajornakusooraluartoq, sumi inissialiortitertoqarnissaanut aalaja-ngiinissamut pisariaqartinneqartunik immersorneqarnissaq pisariaqarpoq.

- Borgmester Asii Cheminitz Narup tusaavara oqaloqatiginnikkumalluni kajumissaaruteqartoq, eqqartorlugit iluarsagassat nutaanillu sananissat akornanni pingaarnersiuilluni qanoq tulleriiaarisoqassanersoq. Taamaattumik ataatsimeeqatiseraara, naapinnissaalu qilanaaralugu, Ineqarnermut Naalakkersuisoq Siverth Heilmann naggaterpiaatigut oqarpoq.