Nunat pingasut akornanni isumasioqatigiinneq

Tre parts seminar

Issittumi aammalu Kalaallit Nunaanni nunap pissusaa pillugu nunat pingasut akornanni isumasioqatigiinneq Ineqarnermut Naalakkersuisup Siverth K. Heilmannip pingasunngornermi 26. marts 2014 ammarpaa.

Korea Kujallermi, Kalaallit Nunatsinni aammalu Danmarkimi nunap pissusaanik ilisimatusarnikkut suliaqartut atorfilittallu attuumassuteqartut ulluni 26. marts – 28. marts Nuummi Katuami isumasioqatigiipput.

- Nunap pissusaa aammalu silaannaap allanngornerata kingunerisaanik pissuserilerumaagaa pillugu issittumi paasissutissanik annertuumik amigaateqarpugut.

Taamaammat Ineqarnermut Naalakkersuisup nuannaarutigeqisaminik Korea Kujalliup, Kalaallit Nunatta aammalu Danmarkip akornanni suleqatigiinnerup annertusarneqarnissaa siunertaralugu atorfilittat akornanni isumasioqatigiinneq ammarpaa.

Ineqarnermut Naalakkersuisup tikilluaqqusilluni oqaaseqarnermini ersersippaa Naalakkersuisut neriuutigigaat kissaatigigaallu nunap pissusaa pillugu ilisimatusarnikkut suleqatigiinneq annertusarneqassasoq.

Isumasioqatigiinnermi Korea Kujalleq sinnerlugu ilisimatuut pisortanilu atorfilittat aqqanillit peqataapput, Danmark sinnerlugu inuit tallimat peqataapput kiisalu Nunarput sinnerlugu oqalugiartussat ilanngullugit inuit 21-it peqataallutik.