True North Gem-imut piiaanissamut akuersissut

Udnyttelsestilladelse til True North Gem

True North Gem-imut piiaanissamut akuersissut Naalakkersuisut akuersissuteqarfigaat

Inuussutissarsiornermut Aatsitassanullu Naalakkersuisup Jens-Erik Kirkegaard-ip ullumi Kalaallit Nunaata kujataata kitaani Qeqertarsuatsiaat eqqaanni rubininut suliassamut piiaanissamut akuersissut atsiorpaa. Tamatumunnga tunngavissarititaasutut ingerlatseqatigiiffiup VVM-ia (Avatangiisinut sunniuitaasussanik nalilersuineq) aamma VSB-ia (Inuiaqatigiinni piujuartussamik iluaqutaasumik sunniutaasussanik nalilersuineq) Naalakkersuisut akuersissuteqarfigaat.

”Kalaallit Nunaanni aatsitassarsiornermut suliassaqarfiup ineriartortinneqarnissaanut suli alloriaqqittoqarpoq”, Jens-Erik Kirkegaard naammagisimaarinnilluni oqarpoq nangillunilu ”Qaammatit arlaqanngitsut ingerlaneranni piiaanissamut akuersissut atsiukkama aappassaraat. Tamanna nunarsuarmut takutitsivoq Kalaallit Nunaat nunatut aatsitassarsiorfiusutut pimoorussilluni, sunniuteqarluartumik aamma pilerinaateqartumik ingerlatserusuttoq ingerlatsisinnaasorlu”.

Alloriarneq tulleq tassaassaaq IBA-mut isumaqatigiissutip inissinnissaata isumaqatiginninniutigineqarnissaa, tassani suliffeqarfinnik kalaallinit pigineqartunik atuinissamut, nunaqavissunik sulisoqarnissamut, ilinniartitaanermut il.il. siunnerfiit arlallit aalajangersarneqassapput. Namminersorlutik Oqartussat aamma Kommuneqarfik Sermersooq IBA-mut isumaqatigiissutissamut piareersaatitut, suliassap najukkami aallaaveqartinnissaa qulakkeerniarlugu, ilaatigut Qeqertarsuatsiaani innuttaasunik ataatsimiititsinernik ingerlatsisarsimapput.

Sanaartornermut immikkoortumi inuit 40-niit 50-inut sulisussatut pisariaqartinneqassapput. Kisitsisit taakkua ingerlatsinermut immikkoortumi sulisunut 80-it missaannut annertusissapput. Naatsorsuutigineqarpoq minnerpaamik sulisussat 75 %-ii Kalaallit Nunaanni sulisussarsiarineqassasut.

Aatsitassarsiorfimmi sulisussat saniatigut naatsorsuutigineqarpoq suliassaq suliffeqarfinni arlalinni, True North Gem-imut nioqqutissanik pilersuinermi kiffartuussissutinillu sullissisussani arlalinni suliffissaqartitsinermut annertusititsissasoq.

Aatsitassarsiorfimmik suliaqarnermut aningaasaqarnikkut atugassarititaasut tassaapput ingerlatseqatigiiffiup akileraarutaanik aamma iluanaarutinit akileraarummik sukkulluunniit atuuttumik akiliisitsinissaq. Tamatuma saniatigut ingerlatseqatigiiffik 5,5 %-imik kaaviiaartitanit royalty-mik akiliisassaaq, kisianni ingerlatseqatigiiffiup akileraarutaa/iluanaarutinit akileraarut royalty-mit naatsorsorneqartumit ilanngaatigineqartassalluni.

Royalty taamaalilluni minnerpaamik akiliutaasassaaq, ingerlatseqatigiiffik Kalaallit Nunaannut ingerlatseqatigiiffiup akileraarutaanik/iluanaarutinit akileraarummik akiliisarpat annikillineqartartusamik imaluunniit atorunnaavittartussamik. Tamatuma saniatigut ingerlatseqatigiiffik sinneqartoorutinit royalty-mik akiliisassaaq, ingerlatseqatigiiffik annertoorsuarmik sinneqartooruteqarpat akilerneqartussamik.

IBA-mut isumaqatigiissut atsiorneqareerpat, illuliortiternissamut ingerlatsinissamullu akuersissutit sukumiisunik avatangiisinut akuersissutitaqartut tunniunneqassapput.

Annertunerusumik paasisaqarusunnermi Ministerip allattaa: Kirsten Enequist, mobil 58 37 54 innersuussutigineqarpoq.

TNG Canada