Pinaveersaartitsinermut peqqinnerulersitsiniarnermullu aningaasanik qinnuteqarit

Peqqinnerulersitsiniarnermik pinaveersaartitsinermilluunniit sulissutissaqarpit piviusunngortissallugu eqqarsaatigisartakkannik? Taava maannakkut Inuunerittamut Aningaasaliissutinik qinnuteqarsinnaavutit.

Inuunerittamut Aningaasaliissutinit ukiumut marloriarluni pinaveersaartitsiniarluni peqqinnerulersitsiniarlunilu najukkani suliniutinut tapersiiniarluni agguaassisoqartarpoq. 2013-imi katillugit 800.000 koruunit missarluinnaat najukkani suliniutinut assigiinngitsunut 50-init amerlanerusunut agguaanneqarput, ilaatigut imigassaq, ikiaroornartoq, pujortartarneq, nerisaqarneq timersornerlu pillugit unnukkut oqallitsitsinernut paasissutissiisarnernullu, inuusuttut imerniartarnerat naamaarniartarnerallu pinaveersaartinniarlugit suliniutinik aallartitsisarnernut, ilaqutariit pujortartarnerannik pinaveersaartitsinernut, timersornerulernissamut periarfissat annertusarniarlugit sungiusaatinut allarpassuarnullu.

Ukioq manna suliniutit meeqqat, inuusuttut ilaqutariillu pujorsartarnerannik pinaveersaartitsilluni sammisaqarfiusut pingaarnerutinneqassapput.

Inuunerittamit Aningaasaliissutinik qinnuteqarnissamut killiliunneqarpoq 1. april 2014. Qinnuteqaatit Peqqissutsimut Attaveqarnermullu Naalakkersuisoqarfimmut nassiunneqassapput. Aningaasaliissutit, aningaasanik agguaassisarnermut tunaartarisassat taamatullu qinnuteqartut immersuiffissaat pillugit paasissutissat annertunerusut uaniipput www.peqqik.gl

Innuttaasut peqqissuunissaat pillugu suliniutip Inuunerittap 2007-imi aallartinneqarneranut atatillugu Inuunerittamit Aningaasaliissutit pilersinneqarput.


Annertunerusunik paasissutissarserusuttut attaveqarfigisinnaavaat:
Peqqinnissamik sulianut siunnersorti Nadja Frederiksen, tlf. 34 66 76,
nafr@nanoq.gl  
Peqqinnissamik sulianut siunnersorti Lisa Christiansen, tlf. 34 66 50,
lich@nanoq.gl