Isumasioqatigiinneq soqutigineqarluartoq

Christiansborg-imi kalaallit Danmarki-imi immikkut pisariaqartitsisut pillugt isumasioqatigiinneq soqutigineqarluartoq.

Pingasunngornermi 5.marts 2014 Naalakkersuisoq Martha Lund Olsen Christiansborgimi kalaallit Danmarkimut nuussimasut immikkut ittumik pisariaqartitsisut pillugit isumasioqatigiinnermi oqalugiartutut aammalu oqalliseqataanermi ilaavoq.

Isumasioqatigiinnerup tunngavigaa kalaallit Danmark-imi najugallit immikkut ittumik inuttut pisariaqartitsisut, minnerunngitsumik pilersaarusiorluarsimanagu Danmark-imut nuuttartut, inuttut peqqinnanngitsumut inuulernissaminnut qanillisarmata, tamatumalu qanoq ikiorserneqarsinnaanera pillugu isumasioqatigiittoqarpoq.

”Rådet for socialt udsatte” isumasioqatigiinnermik aaqqissuisuuvoq.

Isumasioqatigiinnerlu tamanit soqutigineqarluarsimavoq ilaaniarlutik nalunaarsimasut amerlasimaqaat aaqqissuisullu inissat 150-it qaangerlugit nalunaartoqarsimanerarpaat.

Politikkikkut suliaqartunit oqalugiartut ilagaat Minister for Børn, Integration, Ligestilling og Socialeforhold Manu Sareen. Finn Sørensen MF, Enhedslisten-nimeersoq Social- og Grønlandsudvalget-mi ilaasortaasoq.

Tamatuma saniatigut Rådet for Social Udsatte-p siulittaasua Jan Sjursen, Seniorforsker Else Christensen SFI-miit, Jeppe Bülow Sørensen Ålborg Kommuniani kalaallinut sullissinermi immikkoortortaqarfimmi aqutsisoq, aamma Teamchef Helle Rønn Christensen Ålborgimi Kofoed Skole-p ataaneersoq, kingullertut Peter Ellemann Københavnimi angerlarsimaffeqanngitsunik sullissivimmi aqutsisoq oqalugiarput.

Saqqummiisut tunngavigalugit paasinarpoq Danmark-imi pisortatigut sullissineq assigiinngitsorujussuusoq.

Tusarnaartut apeqqutissarpassuaqarnerat malunnarpoq. Tamanit isumaqatigiissutigineqarpoq kalaallit Danmarkimut pilersaarusioqqaarnatik nuuttartut pinaveersaartinnissaanut iliuuseqartoqartariaqartoq.

Suliniutillu aallartereersut Naalakkersuisup Martha Lund Olsen-p nalunaarutigaa, tassalu suliniutitut aallarniutigalugu ilaatigut naalakkersuisoqarfimminiit quppersakkamik piffissami qaninnermi kalaallinut Danmarkimut nuuttunut paasissutissanik imalik saqqummersinneqarnissaa nalunaarutigigamiuk.

Manu Sareen-ip Danmark-imut kalaallit pilersaarusioqqaarnatik nuuttartut naalagaaffeqatigiinnerup aqqani immikkut iliuuseqarfiginissaat piffissanngorsimasoq tapersersorlugu oqaatigaa, aammalu qallunaatut oqaatsinik pisinnaasakikkaanni ajornartorsiutit annerulertarnerat pillugu iliuuseqarfiginissaa aamma pisariaqartoq oqaatigalugu.

Minnerunngitsumillu eqqaasariaqarpoq pisortat avataani soqutigisaqaqatigiittut aaqqissukkamik suliniartut annertuumik suliniuteqarnerat maluginiagassaammat, tamannali kisimi naammanngitsoq paasinarpoq.