University of Alaska-mut pulaarneq

Nick og Brian Rogers

University of Alaska-mut Fairbanks-imiittumut pulaarneq periarfissanik nutaanik ammaavoq

Naalakkersuisunut ilaasortap Nick Nielsen-p Alaskami Fairbanks-imut angalanerani sammisat timersornerinnaasimanngillat.

Pingasunngornermi ullaap tungaani Nick Nielsen-ip Rektor Brian Rogers, University of Alaska, Fairbanks-imeersoq (UAF) ataatsimeeqatigivaa siunissami suleqatigiissutaasinnaasut pillugit.

- Siusinnerusukkut UAF-imut suleqatigiinnissamut isumaqatigiissuteqarsimavugut, ilinniagartuunngorniartut Universitetimi tassani ilinniarnerminnik ingerlatsisinnaanerat pillugu. UAF-imut pulaarninnut pingaarnertut siunertarisimavara paasiniassallugu UAF-imit soqutigineqarnersoq isumaqatigiissutaasimasup nutarterneqarnissaa,

Naalakkersuisoq oqarpoq, ingerlaqqillunilu:

- Maani Fairbanks-imi silaannaap pissusaa nunatsinnut ingammillu nunatta avannaanut eqqaanartorujussuuvoq, aammalu malugisinnaavara kulturikkut assut assigiissuseqartugut.
Ataatsimeeqatigiinnerput ajunngilluinnartumik ingerlavoq, isumaqatigiippugullu siunissami suleqatigiinnissarput marlunnik illinilerlugu ingerlatseqqissagipput:

- Illernit siulliit tassaassapput UAF-ip aamma Ilisimatusarfiup isumaqatigiissuteqarnissaat, tassanilu ilisimatusarfiit taakkua marluk ilinniagartuunngorniartunik semesterimi ataatsimi arlalinniluunniit piffissami ilinniagartuunngorniarfigisaminni Ilisimatusarfinni taakkunani marlunni ingerlatsisarsinnaanerannik imaqassaaq. Ilisimatusarfiit taakkua marluk akornanni isumaqatigiissut aamma ilinniartitsisunik paarlaasseqatigiittarnermik imaqarsinnaavoq, - tamatumunngalu atatillugu uagutsinnut soqutiginartuusinnaapput UAF-imiit ilinniartitsisut tuluit oqaasiinik allamiut oqaasiisut ilinniartitsinermik immikkut piginnaanneqalersimasut - specialiseerersimasut.

- Illernit aappaat UAF-ip aamma Namminersorlutik Oqartussat akornanni isumaqatigiissutaassaaq, taassumalu kingunerisaanik kalaallit ilinniagartuunngorniartut killilikkamik amerlassusillit ilinniagartuunngorniarnermik tamakkiisumik UAF-imi ilinniagartuunngorniarnerminnik ingerlatsisarsinnaalissapput. Tamatumalu saniatigut isumaqatigiissut taanna oqaatsit eqqarsaatigalugit ilisimasanik paarlaasseqatigiittarnermik imaqarsinnaavoq, uagullu kalaallit tamatumunnga atatillugu assut tunniussassaqarpugut, uagummi oqaatsigut nunatsinni nukittuumik inissisimammata Alaskami nunap inoqqaavisa oqaasiinut sanilliullugit. Tamatumunngalu atatillugu Oqaasileriffik pingaaruteqartumik inissisimasinnaavoq.

- UAF aaqqissuussinernik pitsaasunik ingerlatsivoq aammalu assut eqqummaariffigalugit ilinniagartuunngorniartut illoqarfinni minnerneersut pisariaqartitaat, taamaattumik qularinngilara ilinniartuutigut pitsaasunik atugassaqartinneqassasut, naak Alaska-mi ilinniar-nerminni angerlarsimaffimminniit ungasissumiikkaluarlutik.

Naalakkersuisoq Nick Nielsen naggasiivoq, naatsorsuutigaalu isumaqatigiissutit pisari-aqartut 2014-imi upernaap ingerlanerani piareersinnaassasut.