NAMMCO-p 2014-imi ukiumoortumik ataatsimeersuarnera

Atlantikup Avannaani Miluumasut Imarmiut pillugit Ataatsimiititaliaq 22-issaannik ukiumoortumik ataatsimiippoq 25.- 27. februar 2014, Oslo Norge-miittumi. Nunat NAMMCO-mi ilaasortaasut Savalimmiut, Kalaallit Nunaat, Island aamma Norge miluumasut imarmiunik piujuartitsinermik tunngaveqarluni iluaqutigineqarnissaannik qulakkeerinninniarluni sulinermut pimoorussinertik aammaarlutik uppernarsaqqippaat, tamannalu nunarsuup immikkoortuani suleqatigiinnikkut ilisimatuussutsikkullu tunngaveqartumik aqutsinermi aalajangiisarnertigut ingerlanneqassalluni.

NAMMCO-mi ataatsimiinnermi taaseqataasinnaanatik alaatsinaatsutut ilaatitaqarput Canada, Danmark, Japan aamma Russit Naalagaaffeqatigiiffiata naalakkersuisuinit sinniisuutitat.

1. T-NASS 2015
Arferit aarluarsuillu pillugit Atlantikoq illugiissillugu 2015-imi nutaamik annertuumik misissuiffigineqarnissaasa pilersaarusiorneqarnera suli Ilisimatuussutsikkut Ataatsimiititaliami (VK) ingerlanneqarpoq, misissuinissap pisariaqartippaa NAMMCO-mi ilaasortaanngitsunik suleqateqarnissaq, taakkununnga ilaapput Canada, Russit Naalagaaffeqatigiiffiat, USA aamma nunat EU-mi ilaasortat. Peqassutsit, agguataarneri, piujuartitsineq aamma aqutsinerit naliliiffigineqarnerini kisitsinerit nalliuteqqittartut qitiulluinnartussaassapput.

2. Kalaallit Nunaanni aavertassat pillugit nutaamik inassuteqartoqarpoq
NAMMCO’p Siunnersuisoqatigiivisa aarrit pillugit VK-p inassuteqaataa kingulleq akueraa. Uumasunik nalunaaqutserneqarsimasunik qaammataasakkut malinnaavigineqartunik kisitsinernit kingullernit pingasuusunit paasisat paasissutissanillu assersuusiat tunngavigalugit Ilisimatuussutsikkut Ataatsimiititaliaq aarrit immikkoortut pingasuusut Kalaallit Nunaanni pisarineqartartut qanoq amerlatiginersut missiliorlugit nalilersuiffigisimavai. Aarriit immikkoortut marluk amerliartorput, Ilisimatuussutsikkullu Ataatsimiititaliaq amerlanerusunik pisassiissuteqarnissaminut innersuussisinnaanngorsimalluni, ukiut siuliini pisassiissutissatut siunnersuutigineqartut malillugit piujuartitsinissamik tunngaveqarluni piniartitsisoqarnerata kingunerisaanik.

Avannaata Imaani/Avannaata imartaani 2007-imi pisassiisarnerup atuutilersinneqarnissaata tungaanut pisarineqartartut 100-t missaanniissimapput, ilisimatuussutsikkut siunnersuinerup kingorna 60 miissaannut ikilisinneqarlutik. Tamatuma malitsigisaanik aarrit amerliartorput, Avannaata imartaani pisarineqarsinnaasut ilisimatuussutsikkut siunnersuinermi ukiumut aarrit 93-nut amerlisinneqarnerannik nassataqartumik.

Aammattaaq Kalaallit Nunaata Kitaani peqassutsikkut taamaappoq, ukiut siuliini ilisimatuussutsikkut siunnersuinernit pisassiissutissat amerlanerusut innersuunneqarlutik ukiumut 100-t pisassiissutigineqarlutik. Tunumut tunngatillugu kingullermik innersuussinertuut amerlatigisunik innersuussisoqarpoq, ukiumut aarrit 20-t, tamaani uumasut qanoq amerlatiginerannut nutaanik paasissutissaqanngimmat.

Ilisimatuussutsikkut Ataatsimiititaliap nalilerpaa, pisarinngitsuukkat tassa piffisami pisassiiviusumi pisassat sinneruttut ukiup tulliani pisassiissutissanut nuunneqarsinnaanerat akornutissaqanngitsoq. Pisassanik atorneqanngitsoortunik nuussinermi ukiumiit ukiumut amerleriaat atorneqassanngilaq (ikke-akkumullerende).

Ilisimatuussutsikkut Ataatsimiititaliap oqaatigeqqippaa, uumasut pisarineqartut annaaneqartullu pisassiissutinut tamarmik ilaareermata, aammaarluni sakkortuumik oqariartuutigeqqippaa, pissatanik annaasanillu piniarfiusuni tamani pisallu suunerinik tamanik paasissutissanik katersisoqassasoq.

3. Miluumasut imarmiunik piniarneq pillugu najoqqutassiat
2010-mi piniarneq pillugu najoqqutassianik suliarinnittoqarnissaa Siunnersuisoqatigiit akueraat. Najoqqutassiat annertuut siullerpaajussapput maanna naammasssineqareersut NAMMCO-mit akuerineqarput. Najoqqutassiat arfernik angisuunik aamma niisarnanik piniarnermi isumannaatsuunissaq qitiutinneqarluni, ilaatigut sakkut aamma aqerlup ingerlaarfii sukkassusaallu pillugit sukumiisumik piniartunut ilisimatitsissutaasussaapput. Najoqqutassiat kalaallisuunngorlugit aamma oqaatsinut attuumassuteqartunut allanut nutserneqarlutik pissarsiarineqarsinnaassapput.

4. Inuussutissanik pilersuineq miluumasullu imarmiut pillugit 2015-imi ataatsimeersuarnissaq
NAMMCO’p Siunnersuisoqatigiivisa 2015-imi inuussutissanik pilersuinerup isumannaatsuunissaa aamma miluumasut imarmiut pillugit 2015-imi ataatsimeersuartoqarnissaa pillugu aningaasatigut missingersuutit akuerai. Miluumasut imarmiunik inuussutissat isumalluutit tassaapput atorluarneqanngitsut, qularnanngitsumik nunarsuarmi avatangiisinut ajoqusiinnginnerpaanut ilaasut. Suleqatigiissitamik pilersaarusiortussamik pilersitsisoqarpoq 2015-imi pisussamut piareersaasussamik.

5. EU-p puisit amiinik tunisassianik eqqusseqqusinnginnera – WTO-mi suliaq
NAMMCO’p uteqqippaa, EU-p puisit amiinik eqqusseqqusinnginnera imaani pisuussutinik Atlantikup avannaani piujuartitsinissamik aqutsinissamillu tunngaviusunik nunat tamat akornanni akuerisaasunik soqutiginninngitsoq tunngavianillu qajannarsisitsisoq. Sumiiffinni nunaqarfimmiorpassuarnut ilungersunartumik aamma aningaasaqarniarnikkut pitsaanngitsumik kinguneqarpoq, Atlantikup avannaani puisinik isumalluuteqartunut, tassunga ilaallutik Inuit inuiaqatigiit. Apeqqummut tamatumunnga ilaapput Atlantikup avannaani pisuussutit imarmiut piujuaannartinneqarnissaannik aqunneqarnissaannillu tunngaviit pingaarutillit, soorlu pisuussutit imarmiut uumassusilinnik piujuartitsinermik tunngaveqarluni katersuisinnaatitaaneq aamma piniarnermik aallaaniarnermillu nioqqutissianik tuniniaasinnaatitaaneq.

WTO-mi paasisimasallit inerniliipput, EU-p puisinik inerteqquteqarnera WTO-mi assigiinngisitsinissamik malittarisassanik unioqqutitsinerusoq. Kisianni paasisimasallit peqqussut pisariaqarnera sinnerlugu niuernermut akornusersuisuneranik inerniliinngillat. Norge, Canada aamma EU-p WTO-mi paasisimasallit inerniliussaat suliassanngorteqqinnikuuvaat. Island peqataasut pingajuattut ilanngussaqarnikuuvoq. Aalajangiisoqarnissaa ilimagineqarpoq april / maj 2014-imi.

6. Arfernut angisuunut piujuaannartitsinermik tunngaveqarluni pisassiissutinik naliliisoqarnissaanik Kalaallit Nunaata qinnuteqaataa
Kalaallit Nunaata VK Kitaani soqqallit angisuunut peqassutsit tamaasa pillugit naatsorsuinerit nutaat tunngavigalugit piujuaannartitsinermik tunngaveqarluni iluaqutigineqarnerat pillugu paasissutissanik tunniusseqqullugu qinnuvigisimavaa.

7. NAMMCO-p tulliani ukiumoortumik ataatsimeersuarnissaa
Ukiumoortumik ataatsimeersuarnissaq tulleq 2015-imi Island-imi pissaaq.

Sukumiinerusumik paasissutissanik pissarsisoqarsinnaavoq uunga saaffiginninnikkut:
Amalie Jessen
Toqq/direkte + 299 345304 / + 299 55 33 42 - amalie@nanoq.gl

Paasissutissat tuluttut