Eqqakkat aqunneqarsinnaanerulissapput

Aqqusinerni, eqqaavissuarni eqqakkat imaani avatangiisitsinni mingutsitsisut, ikuallaaviit amerlavallaat ingerlalluanngitsut – avatangiisinut suliassaqarfimmi unammilligassat amerlasoorpassuupput annertullutillu.

Kim Kielsen-ip aamma Kommune Kujallermi Borgmesterip Jørgen Wæver Johansenip ullumi politikkikkut siunertanut nalunaarut kommunini isumannaatsumik eqqagassalerinermut aqqutissiuussisussaq atsiorpaat. Siunertanut nalunaarut Kommuni Kujallermi eqqaavissuarni saliinermik aammalu isumannaatsumik ikuallaasarnermut aaqqiissutissanik pilersitsinermik kinguneqassaaq, tamatumalu kingorna suleqatigiinnermit misilittakkat nuna tamakkerlugu ullutsinnut naleqqunnerusumik isumannaannerusumillu eqqagassalerisarnermut tunngavissaliissapput.

”Eqqagassalerineq kommunit akisussaaffeqarfigaat, kisianni kommunit kisimik suliassarujussuaq taanna isumagissanngilaat, uangalu peqqinnissamut peqqissusermullu ulorianartorsiortitsisumik innuttaasunut qanilluinnartumi ammaannartumik ikuallaasoqartarnera akuerisinnaanngilara. Isumaga malillugu pinngortitaq najugarput asseqanngilaq, taannalu paarissavarput. Peqqissuserput pinngortitarlu eqqarsaatigalugit malugineqarsinnaasumik avatangiisini pitsanngorsaanernik pilersitsinissaq tassa nukinginnarluinnarpoq”

oqarpoq Avatangiisinut Pinngortitamullu Naalakkersuisoq Kim Kielsen.

Kim Kielsen-ip Avatangiisinut Pinngortitamullu Naalakkesuisutut akisussaaffik november 2013 tigummaguli eqqagassalerinerup iluani suliniutinik aalajangersimasunik allartitsinissamut suliaqarneq ingerlanneqarpoq. Suliaqarneq taanna ilaatigut KANUKOKA qanimut pilersitsiviulluartumillu oqaloqatigalugu pivoq.

Avatangiisinut aningaasaateqarfimmik pilersitsinissaq sulissutigineqassasoq Inatsisartut aalajangerput. Avatangiisinut aningaasaateqarfiup 2015-imiit atuutilernissaa naatsorsuutigineqarpoq. Aningaasaateqarfimmut isertitassat avatangiisinut akitsuutinit pissarsiarineqassapput. Aallaqqaammut akitsuutit nukissiornermut tunisassianut akitsuusiussaareersut atorneqassapput. Siunissami aamma tunisassianut avatangiisinut ajoqusiisartunut allanut aamma avatangiisinut akitsuusiisarnissaq atuutsinneqalissasoq naatsorsuutigineqarpoq. Avatangiisinut aningaasaateqarfik taamaalilluni avatangiisinut akitsuutit aamma avatangiisini pitsanngorsaataasunik suliniutinut atorneqartarnissaannut qulakkeereqataassaaq.

”Angalanerinnarluunniit sivisunerpaaq alloriarnermik ataatsimik allartittarpoq, aammalu suliaqarnissaq – ilungersorluni sulinissaq pisariaqarpoq. Pinngortitamik avatangiisinillu mingutsitsineq isiginngitsuusaaginnarneqassanngilaq, akisussaaffik tamatsinniippoq aammalu immikkut suliniuteqarnissamut pisariaqartitsineq annertuvoq. Avatangiisinut aningaasaateqarfimmi aningaasat kisimik naammanngillat. Kommunit eqqagassalerinermut taakkualu aningaasalersorneqarnissaannut suli pingaarnertut akisussaasuupput, kisianni tamatta ataatsimoorluta malugineqarsinnaasumik avatangiisini pitsanngorsaanissamut aqqutissiuussissaagut ”

erseqqissaavoq Avatangiisinut Pinngortitamullu Naalakkersuisoq Kim Kielsen.