Qimmit ajunngitsumik pineqartariaqarput

Slædehundevæddeløb

Uumasut nakorsaat Avannaata Qimussusersuanut: Qimmit ajunngitsumik pineqartariaqarput

- Ajoraluartumik qimmit ilaat pitussimanngitsut perlileqisut sukkaniuuttarfiup tikittarfiata eqqaani takusarpakka nerukkaatissanit aak serminnguussimasoq neriniarlugu assanniarsarigaat. Qimmit ilaat perlilertangaaramik inunnut sungiusimanngisaminnut qunoqalutik nerinialuttarlutik. Qimmit taama pineqartussaanngilluinnarput. Taama uumasut nakorsaat, Sanne Eline Wennerberg, Ilulissat, qimussimik sukkaniuttoqariiginnartoq qimmit perlilerlutik nerinialuttarnerat pillugu oqarpoq.

Avannaata Qimussersua inuppassuarnit malinnaaffigineqartartoq Ilulissani arfininngorpat, marsip 29-anni pissaaq. Sukkaniuuttuussaallutik nunatsinni qimussillaqqinnerpaat.

Uumasut nakorsaat isumaqarpoq qimussimik timersuutitut sukkaniuutsitsisarneq qimussertarnermut nunatsinnullu nunanit allamiut nunatsinnut tikisinnissaannut ussassaarutigissallugu pitsaanerpaanngitsoq.

- Tusatsiakkanit oqaatigineqartuarpoq qimmit naalanngitsut sukkaniuuffissap aallartarfiata eqqaani inuttaminnit toqunneqartartut, qimmillu sukkaniuunnermi uniarneqartarlutik.

- Qimmit inuttaminnit taama pineqartut akisussaassuseqannginnermik takutitsinerusarpoq, Sanne Eline Wennerberg erseqqissaavoq.

Nunatsinni inatsisit naapertorlugit sukkaniuunnermi qimmit pituutaat kipeqqusaanngillat qimmillu imminiiginnaqqusaanatik.

Malittarisassat allanngortinneqarsinnaapput

Uumasut nakorsaat qimussimik sukkaniuuttunik ataasiaannarani isiginnaarsimasoq isumaqarpoq sukkaniuunnermi malittarisassat allanngortinneqartariaqartut.

- Timersuutit suulluunniit malittarisassaqartarmata, sukkaniuuteqataasut pillugit malittarisassiuunneqartariaqarput. Sukkaniuuttumit malittarisassat unioqqutinneqarpata unioqqutitsisoq sukkaniuunnermit peqataasinnaajunnaartassalluni, Sanne Eline Wennerberg oqarpoq.

- Malittarisassani pinngitsoorani piumasaqaataasariaqarpoq qimmit apuuttarfimmut tikinnermi amerlussaasa aalajangersimasuunissaat . Sukkaniuunnermi tassaammat qimussertoq qimmiminik suleqateqarluarluni siulliuniuunneq, apooqqaanniuunneq. Timersortartorpalaanngivittarpoq qimussertup sukkanniuunnermi qimmini pituussaarlugit imminiiginnarsimagaangagit, Sanne Eline Wennerberg erseqqissaavoq.

Uumasut nakorsaat Norgemi qimussimik sukkaniuuttunik ukioq aallartissimalersoq isiginnaarsimasoq isumaqarpoq qimmit qanoq ilillugit pangalitsilluartarnissaannik annerusumik kajumissaarineqarnerusariaqartoq.

- Nunatsinni nalinginnaalluinnarpoq qimmit sukkanerusumik pangalatsinniarlugit nerukkaatissaanik apuuffimmi ilisisarneq. Takusarpagut qimmit apuuffimmi nerrersoqalutik nerivataartartut. Taama pissuseqartarnerat qimmit perlilernerinit ilaatigut patsiseqartarpoq. Tamanna akuersaarneqarsinnaanngilluinnarpoq, qimmit nukissaarutereersut pinngitsaalillugit pangalitsinneqartarmata, Sanne Eline Wennerberg oqarpoq.

Norgemi qimussimik sukkanniuunneq

Norgemi qimussimik sukkaniuuttartut akissarsiutigalugu sukkaniuuttartuupput.
Amerlanerit qimusserneq nuannareqalugu inuussutissarsiutigaat. Qimmitik ukioq kaajallallugu sungiusartarpaat. Qimmit tuaviuunnagit sukkasuumik isorartuumut pangalitsinnissaannut sungiusarneqartarput. Qimmit ullut tamaasa nerisinneqartarlutik. Qimmit pangalitsinneqartarput
Qimmit nuannereqisaminnik pangalittarput, soorlu kalaallit qimmii aamma taama pisartut. Norgemi qimmerineqartartut alaskamiut qimmeraat huskynik pineqartartut.

- Qimmit takullugit misigisaq nuannersuuvoq, qimmit piuminaqimmata. Qimussertartut qimmitik uukkatarilluaraat takuneqarsinnaavoq. Takutippaat qimmit uukkatarilluakkat qanilaakkallu isorartoorsuarmut pangalatsinneqarsinnaasut, uumasut nakorsaat oqaluttuarpoq.

Norgemi qimussimik sukkaniuuttartut qimmeq qitiutilluinnarpaat. Qimmip ukkatarineqarnissaanut erseqqilluinnartunik malittarisassaqarput.

Peersitaasarpoq

Norgemiut qimussimik sukkaniuunnermi malittarisaasa ilaanni allassimasoqarpoq qimmit naalliutsinneqassanngitsut, akuersaarneqaranilu pisariaqanngitsoq qimmit pillarneqartarnissaat nilliaffigineqartassanngitsullu. Qimmit iperartorneqarnissaat akuersaarneqanngilaq saqitsarneqarnissaannullu allamik aamma unaataassutaasinnaasumik sakkoqaqqusaanngilaq. Qimussertoq qamutit perlaavisa uiuinut nikuilluni napariarsuutigaluni qimmini aquttarpai.

- Aamma malittarisassaavoq qimmit qassit qimuttuussanersut, apuunnermilu qassiunissaannik aamma malittarisassaqarluni, uumasut nakorsaat oqaluttuarpoq.

- Sukkaniuunnermi qimmit qimuttuusinnaajunnaartut qamutit qavaniitsinneqartarput sukkaniuuffimmiluunniit nakkutilliisunut, uumasut nakorsaannut tunniunneqartarlutik. Sukkaniuuttoq qimmiminik maangaannartitsisoq sukkaniuunnermit peersitaasarpoq, Sanne Eline Wennerberg oqarpoq.
Uumasut nakorsaat isumaqarpoq Avannaata Qimussersuanik aaqqissuisut sukkaniuunnerni qimmit pitsaanerpaamik atugaqarnissaat anguniarlugu qimussimik allani sukkaniuutitsinernut isumassarsiorumaartut.

Qimminik takusaavoq

Uumasut nakorsaat aqagu, arfininngornermi sukkanioqataasussat qimmiinik ulluni makkunani misissuivoq, Avannaata Qimussersua ukiut tallimassaannik nakkutigisussaallugu.

- Qujanartumik nakkutilliisuusarninni sukkaniuuttussanut politiinik unnerluuteqarsimanngilanga, Sanne Eline Wennerberg oqarpoq.

Uumasut nakorsaat oqaluttuarpoq qimmit amerlanersaat sukkaniuunnermut peqataalluarsinnaasut.
- Qimmilli ilaannut issillualissappat anorlilissappallu iluarnavianngilaq, qialissaqigamik. Qiianiaratik nukersornerulissagamik pangalinnissaminnut nukissaqarpiarunnaassallutik, Sanne Eline Wennerberg oqarpoq.

Uumasunik illersuinermut inatsit

Uumasut nakorsaat pisinnaatitaavoq qimussertartumut oqarsinnaalluni sukkaniuunnermut peqataassanngitsoq.

- Qimmit illersorneqarsinnaanngitsumik inuttaminit naalliutinneqarpata, annilaangatsinneqarpata, uumaasunertik naallugu naalliutsinneqarpata, ajorluinnartumillu pineqarpata toqussinnaavakka. Qimmillu illersorneqarsinnaanngitsumik pineqarpata politiit pisinnaatissinnaavaannga, taakku isumagissagikka.

- Qimmit nerisilluarneqarneqarnissaannik pisinnaatinneqarsinnaallunga. Qimmit taamaatillugit sukkaniuutinneqarsinnaanngillat, peqaatinneqarpata tamanna akisussaassuseqanngitsumik iliornerussalluni, Sanne Eline Wennerberg oqarpoq.

- Neriuutigaara KNQK-lu inerititalimmik suleqatigiilluarsinnaalluta, qimmit illersorneqarnissaat pillugu, aamma timersuutitut sukkaniuuttarneq qimminut inunnullu nuannaarutaasuaannarnissaa qulakkeerneqassalluni, Sanne Eline Wennerberg oqarpoq.