Naalagaaffiit Peqatigiit allattaanerat Kalaallit Nunaannut tikeraassaaq

Statsministeri Naalagaaffiillu Peqatigiit allattaanerat Kalaallit Nunaannut tikeraassapput

Danskit statsministeriat, Helle Thorning-Schmidt, aamma Naalakkersuisut Siulittaasuat, Aleqa Hammond, Naalagaaffiit Peqatigiit allattaanerata Ban Ki-moonip ulluni 25. – 27. marts 2014 Kalaallit Nunaanni tikeraarneranni qaaqqusisuupput.

Tikeraartoqarnermi Naalakkersuisut Siulittaasuat aamma Avatangiisinut Pinngortitamullu Naalakkersuisoq, Kim Kielsen, Kalaallit Nunaannut sinniisuussapput.

Tikeraarnermi allattaanerup statsministerillu silap pissusaata allanngornerata taassumallu Issittumi avatangiisinut sunniutaasa kinguneri, taakkununnga ilanngullugit Issittumi najugalinnut nunarsuup kissakkiartornerata kingunerisai, nammineerlutik takunissaannut periarfissaqassapput.

Tikeraarneq tassaavoq Naalagaaffiit Peqatigiit allattaanerata sila pillugu ullormi 23. september 2014-imi New Yorkimi ataatsimeersuartitsinissaanut aallarnisaataasussaq.
Ataatsimeersuarnermi nunat siuttui arlallit, suliffeqarfiit, aningaasarsiornermillu ingerlataqartut sinniisaat il.il. saqqummiussinissaat naatsorsuutigineqarpoq. Taakkualu saqqummiussassaasa nunarsuarmi gassinik ulorianartunik aniatitsinermik qanoq isiorluni killilersimaarinissamut siunnersuutinik imaqarnissaat naatsorsuutigineqarpoq. Aammattaaq ataatsimeersuarnissamut piareersarluni juunimi 2014-imi New Yorkimi allattaanerup aqutaanik kattuffiup Sustainable Energy for All-ip (SE4ALL-ip) ataatsimeersuartoqassaaq.

Siunertarineqartoq tassaavoq, sila pillugu ataatsimiinnerit tamakkua tassaassasut nunat tamalaat akornanni sila pillugu isumaqatiginninniarnerit Naalagaaffiit Peqatigiit Silamut Isumaqatigiissutaanniittunut ikorfartuutaanissaat, taakkualu 2015-imi Parisimi COP21-qarnissamik kinguneqartussatut naatsorsuutigineqarput. Sila pillugu isumaqatigiissutissami aalajangersarneqassaaq, nunarsuup kissakkiartornera nunarsuarmioqatigiit qanoq isillutik aaqqiivigissaneraat kiisalu CO2-mik aniatitsinerup 2020-p kingorna qanoq isilluni annikillisinneqassanersoq.


Aleqa Hammond,
Naalakkersuisut Siulittaasuat