Naalakkersuisut Siulittaasuata Danmarkip nunanut allanut ministerertaava ataatsimeeqatigaa

Naalakkersuisut Siulittaasuata ullumi danskit nunanut allanut ministerertaava, Martin Lidegaard, ataatsimeeqatigaa. Martin Lidegaard ulloq 3. februar 2014 nunanut allanut ministerinngorpoq.

Naalakkersuisut Siulittaasuata nunanullu allanut ministerip siumut iliuusissat qitiutillugit Danmarkip Kalaallit Nunaatalu suleqatigiinnissaat eqqartorpaat.

Ataatsimiinnermi Issittumi suleqatigiinneq, EU-p Kalaallit Nunaatalu peqatigiillutik suleqatigiinnissamut isumaqatigiissutaat kiisalu Kalaallit Nunaanni aatsitassarsiornermut tunngatillugu aningaasaliisussanik kajumissaarinissaq pillugu suleqatigiinnissaq immikkut ittumik qitiutinneqarput.

Naalakkersuisut Siulittaasuat Aleqa Hammond ataatsimeereernerup kingorna ima oqarpoq:

”Ataatsimeeqatigiinnerup siulliup naammassinerani maannangaaq oqaatigereersinnaavara, nunanut allanut ministerertaarlu apeqqutit Kalaallit Nunaannut pingaaruteqartut pillugit suleqatigiilluarpugut.

Danmarki Kalaallit Nunaallu peqatigiillutik angusinnaasarpassuaqarput. Piffissami aggersumi apeqqutit pillugit nunanut allanut ministerilu suleqatigiinnitta nanginnissaa qilanaaraara.

Nunanut allanut ministeri siullermeerlunga ataatsimeeqatiginerani kingorna takusinnaalereerpara, nunanut allanut ministeri Kalaallit Nunaat naleqartitaanut soqutigisaanullu pitsaasumik paasinnittaaseqartoq. Tamatuma Naalagaaffeqatigiit sinnerlugit neriulluartilerpaanga, Danmarki nunanut allanut ministerertaarsimammat taamatut paasinnittaasilimmik, qularinngilaralu piffissami aggersumi danskit kalaallillu ataatsimoorlutik aalajangersimasunik suleqatigiissuteqarnissaannik tamanna kinguneqassasoq.

Nunanut allanut ministerilu ullumi suliassaqarfiit aalajangersimasut eqqartorpavut - soorlu nunat allat nutaamik Issittumik soqutigisaqalersimasut, kiisalu Kalaallit Nunaanni aatsitassarsiornermut tunngatillugu aningaasaliisussanik kajumilersitsiniarluni ataatsimoorluni iliuuseqarnissaq – uanga isumaga naapertorlugu ataatsimoorluta Kalaallit Nunaannut periarfissanik nutaanik pilersitseqatigiissutigisinnaasarput.

Siunissami qaninnermi nunanut allanut ministerip Kalaallit Nunaannut tikilluaqqunissaa qilanaaraara.”