Meeqqat atuarfiannut malersuisoqanngilaq

"Isumaqatigiinngitsoqarpoq, kisianni meeqqat atuarfiannut malersuisoqanngilaq"

Taamatut oqarpoq Ilinniartitaanermut Naalakkersuisoq, Nick Nielsen, taannalu isumaqarpoq meeqqat atuarfiat pillugu qanoq oqallinnissaq politikerit toqqaannartumik aalajangissagaat, oqallinnissamullu inissaqartariaqartoq, aamma isumaqatigiinngitsoqartorujussuugaluarpalluunniit. Nick Nielsen nangippoq:

”Meeqqat atuarfiat oqallisigineqarpoq – nunatsinni nunanilu allani taamaattoqartuaannarnikuuvoq ukiuni aggersuni aamma oqallisigineqartassalluni. Tamatta inuunitsinni ukiut quli missaanni meeqqat atuarfinniinnikuuvugut meeqqavullu ernuttagullu atuartileraangatsigit atassuteqarnerput nangittarpoq. Taamaammat meeqqat atuarfiat taassumalu qanoq ittuusariaqarnera pillugu kikkut tamarmik isumaqarput.

Atuartut assigiinngitsorujussuarnik tunuliaqutillit meeqqat atuarfianni inissaqartinneqassapput, meeqqattalu atuarnerminni tunuliaqutaannik allaanerusumik tunuliaqutillit peqatigalugit atuarnissaat akuerisariaqarparput. Atuarfik inuiaqatigiinni assigiinngiiaassusermik takutitsivoq. Taamaammat isumaqatigiinnginnissaq qanoq iliorluta peqatigiilluta meeqqat atuarfiata pitsanngortinnissaata oqallisiginissaanut inissaqartariaqarput.

Naalakkersuisunngorninnit ukioq ataatsip qaangiutingajalernerani nunatsinni assigiinngitsuni atuarfippassuit pulaarpakka, tassani ilinniartitsisut atuartullu oqaloqatigisarlugit. Aamma GUX-ip taamatut pulaarnissaa piffissaqarfiginikuuara, tassani ilaatigut ilinniartut meeqqat atuarfianniinneranni  misigisaannik oqaloqatigisarlugit.

Pulaarnikka tunngavigalugit paasivara nunatsinni atuarfiit suliniuteqarnerannik angusaannillu nersortariaqartut, atuarfeqarpoq pitsanngoriartortunik aammali atuarfeqarpoq pitsannguinissamik inissaqartumik, paasinarluni taakkunani suleqatigiinneq ingerlalluanngitsoq, atuarfiit iluanni suleqatigiinnermi angajoqqaanillu suleqateqarnermi.

Oqallinneq pitsaassusilerniarlugu meeqqallu atuarfiat pitsanngorsarniarlugu KANUKOKA aamma IMAK suleqatigalugit meeqqat atuarfiannik nalilersuineq aallartinnikuuara, Naalakkersuisullu ilinniartitsinermut pilersaarut II-kkut siunnersuutigaat angajoqqaanik qaninnerusumik suleqatigiilersoqassasoq. Aammattaaq Andreas Uldum inakkusuppara Sermersooq Kommunimi atuarfiit pulaaqqullugit, taamaalilluni atuartut ilinniartitsisullu atugassarisaat nammineerluni paasisaqarfiginiassammagit.

Inussiarnersumik inuulluaqqusilluta

Nick Nielsen