FK puisinniartarneq pillugu tusarniaqataanermut peqataassaaq

FK 270114

Finn Karlsen puisinniartarnerup tusarniutaanissaa pillugu: Inuit immikkut isigineqarnerat puisimit tunisassiat eqqorlunneqaatigaat.

”Isumaqarpunga piffissanngortoq allatut iliuuseqassalluni”.

Taama Aalisarnermut, Piniarnermut Nunalerinermullu Naalakkersuisoq, Finn Karlsen, nunatsinni puisinniartarneq pillugu Christiansborgimi sisamanngorpat tusarniutigineqarnissaanut atatillugu oqarpoq.

Inuit puisimit tunisassiaasa immikkut isigineqarnerat pissutaalluni puisit amiinik nunatsinneersunit EU-mut suli tuniniaasinnaavugut aammalu ineriartortitsilluta, puisit amii 2010-mi peqqussummut naleqquttumik ilisarnaaserneqarsimappata.

Taamaakkaluartoq Inuit puisimit ukiuni marlussunni kingullerni tunisassiaat immikkut isiginiarneqaraluartut paasinarsivoq peqqussut nunatta puisinik tunisassiornermiit aningaasaqarniarnerata ilaanut eqquinerluppoq.

”Piffissanngorpoq kingusinaartinnata oqaloqatigiissutigissallugu nunarsuarmioqatigiittut ataqatigiinnissaq qanoq ittoq atorneqassanersoq. Puisimit tunisassiat niuernikkut akimmisaartinneqarnerata illuatungilerniarnera kisiat pinnagu aammali Inuit peqqussummi immikkut isiginiarneqarnerat nunarsuarmioqatitsinnut paasisitsiniutigisariaqarparput nukigut kattullugit ataatsimoorluta.”

Finn Karlsen oqarpoq.

Christiansborgimi nunatsinni puisinniartarneq pillugu sisamanngorpat, februaarip 13-anni, tusarniutigineqassaaq. Aalisarnermut, Piniarnermut Nunalerinermullu Naalakkersuisoq, Finn Karlsen, saqqummiussisunut ilaassaaq.

Nunatsinni puisinniartarneq pillugu Folketingip nunarput pillugu ataatsimiititaliaata, Grønlandsudvalget, aaqqissugaraa.