Sanaartornermi kulturi ajoqutaasartoq allanngortinneqassaaq

- Sanaartornermik suliaqartut akornanni kulturi ajoqutaasartoq, sanaartornerlunnermik kinguneqartartoq allanngortinneqassaaq, Naalakkersuisunut ilaasortaq Siverth K. Heilmann Morten Gosvig-ip tallimanngornermi aamma arfininngornermi 21.-22. marts 2014-imi KNR-imi radioavisikkut oqaaserisaanut qisuariaateqarluni oqarpoq nangillunilu: Taamaattumik sanaartornermik suliaqartut tamarmik sanaartornerluttarnermut aaqqiissuteqarnissamut tunniusimaqqullugit suleqataaqqullugillu kajumissaarpakka.

Sapaatip akunneranni kingullermi radioavisikkut tusaavarput Morten Gosvig, ingeniørit suliffeqarfiannit Masanti-meersoq, pikkorissartitsinissamut pilersaarutaasumut, sanaartornermi kukkusoqartarneranut suliniutinik nukittorsaasussamut Namminersorlutik Oqartussat suleqatissatut toqqagaat naammagittaalliutigigai. Taamaalilluni suliffeqarfiit nunatsinneersut suleqatigiinnermut akuunerunissaat Morten Gosvig-ip ujartorpaa.

Ineqarnermut Naalakkersuisoqarfiup Aalborg Universitetimi Statens Byggeforskningsinstitut (SBi), ilisimatusarnermik ingerlatsiviup immikkut ilisimasaqarnera tunngavigalugu siunnersuinissaq pillugu suleqatigiinnissamut isumaqatigiissuteqarfigaa. SBi sanaartornermi ilisimatusarnikkut piginnaasaqarnera, uagut maani piginngisatsinnik peqarmat, naalakkersuisoqarfiup SBi suliassamik suliakkernissaa pissusissamisuuginnarpoq. Paasinarsisimavoq Danmarkimi Byggecentrum – nammineerluinnarluni suliniuteqarluni – pikkorissartitsinermik assingusumik pilersaarusiulereersimasoq, taamaattumillu nukiit ataatsimut suliniuteqarnissamut kattunneqarput.

- Sannarluttarnermik ajornartorsiutinut aaqqiiniarnermi sanaartornermik suliaqarfiit peqataanerusinnaanerannut pilersitsiviulluartumik oqallinnissamut taarsiullugu sannarluttarneq qaangerniarlugu suliniuterpassuit ilaat ataaseq isornartorsiorneqarpoq. Ilinniartitseqqinnissamut pikkorissartitsinissamullu pilersaarutit suliarineqarnerinut najukkani sanaartornermik suliaqartut isumasiuinerat tunngavigineqarpiarpoq. Tassalu SBi Kalaallit Nunaanni najukkani entreprenørit, sanaartornermik aqutsisut sanatitsisullu akornanni apersuilluni misissuisimavoq, najukkani misilittagarpiaat pikkorissartitsinissamut ilanngunniarlugit, Ineqarnermut Naalakkersuisoq Siverth K. Heilmann ilisimatitsivoq, ilassusiillunilu oqarluni sanaartornermik suliassaqarfiit pikkorissartitsinissamut neqeroorut taanna tigulluassagaat, aammalu suliassaqarfik tamaat isigalugu sanaartornermi kukkunernik sumiginnaanernillu akiuiniarluni suliniutinik nukittorsaaniarnermi taperseeqataanissaq Naalakkersuisut neriuutigigaat.

Namminersorlutik Oqartussat sanatitsisutut sanaartukkani nutaanerusuni arlalinni suliat pitsaassusiini ajornartorsiutinik akuersaarneqarsinnaanngilluinnartunik naammattuugaqartarnerat ilumoorpoq. Taamaalilluni kukkunernik amigaatinillu, amerlanerpaatigut sanaartornermik aqutsinermi sumiginnaanernik peqquteqartinneqartariaqartunik, iluarsiiniarnermut inuiaqatigiit piffissarujussuarmik atuisinneqartarput aningaasarpassuarnillu akiliisinneqartarlutik.

Tamanna sanaartornermik nakkutilliisumit, pisortanit sanatitsisunit suliassanik isumaginnittussatut atorfinitsinneqarsimasumit arlaleriarluni toqqaannartumik nassuerutigineqarsimavoq.