Arctic Winter Games (AWG)

Asii og Nick

Arfininngorneq 22. marts Kalaallit Nunaata Issittormiut unammiuaaqatigiinnerannik - Arctic Winter Games-imik (AWG) aaqqissuisuuneq tigussavaa.

Tamanna pissaaq Fairbanks-imi Issittormiut unammiuaaqatigiinnerisa naggataarneqarnerannut atatillugu Kommuneqarfik Sermersuup Borgmesteriata Asii Chemnitz Narup-ip illoqarfik aaqqissuisuusussaq – Host City – sinnerlugu AWG 2016-imut aaqqissuisuunissaq tiguppagu. Illoqarfittut aaqqissuisuunermi akisussaaffik Asii Chemnitz Narup-ip saniatigut Ilinniartitaanermut, Kultureqarnermut, Ilageeqarnermut Naligiissitaanermullu Naalakkersuisumik Nick Nielsen-imik aamma Kalaallit Nunaanni sulisitsisut peqatigiiffianni siulittaasumik Henrik Leth-imik ilaasortaqassaaq.

- AWG 2014-imi peqataaneq misigisaavoq imaannaanngitsoq, aammalu tulluusimaarnaqaaq 2016-imi Issittormiut unammiuaaqatigiinnissaannut – Arctic Winter Games-imut – akisussaaffik tigusussanngorlugu. Nunatsinnut aammalu Nuummut Issittormiut unammiuaaqatigiinnnerannik ingerlatsiffiusussamut misigisaassaaq imaannaanngitsoq Issittormiut Nuummi katersuunnissaat, Asii Chemnitz Narup oqarpoq.

- Maannamiit 2016-imi marsip tungaanut piareersaatigut annertusiartortinneqassapput. Issittormiut unammiuaaqatigiinnerannik aaqqissuussisuuneq Nuummut aammalu Nunatsinnut tamarmut piginnaasaatigut qaffassaanissamut, nammineq piumassutsimik suliniutinik ingerlatsisuusarnerup nukittorsarnissaanut aammalu kommunit, Namminersorlutik Oqartussat, suliffeqarfiit innuttaasullu suleqatigiittarnerisa nutarteriffiginissaannut periarfissiilluassaaq.

Illoqarfittut aaqqissuisuunissami AWG 2016-imut atatillugu takorluukkat aamma naleqartitat sisamanngornermi marsip ulluisa 20-anni Fairbanks-imi ilasseqatigiissitsinermi saqqummiunneqassapput.

- Issittormiut AWG-mi unammiuaaqatigiittarneranni siunertaasoq pingaarneq soorunami tassaavoq timersorneq, kulturi aammalu issittormiut inuusuttaasa nunani killeqarfiit akimorlugit naapisimaaqatigiittarnerat. Kisiannili AWG aamma Kalaallit Nunaannut periarfissatsialaavoq imminut ussassaarutiginissamut, aammalu takutitsinissamut ataatsimoorluta suliniutinik angisuunik kivitseqatigiissinnaasugut. Ilasseqatigiissitsinerullu siunertaraa issittumi ikinngutigut tusagassiortullu 2016-imi Isittormiut unammiuaaqatigiinnissaannik eqqaasissallugit, minnerunngitsumillu Kalaallit Nunarput ilisaritissallugu, Nick Nielsen oqarpoq.

Asii Chemnitz Narup aamma Nick Nielsen ilasseqatigiinnermut qaaqqusisutut ataatsimoorlutik qaaqqusaminnut tikilluaqqusipput. Aqutsisoqatigiinni siulittaasoq, Christian Keldsen, aamma General Manager, Maliina Abelsen, tamatuma kingorna AWG 2016-imut pilersaarutinik takorluukkanillu saqqummiussipput. Ilasseqatigiinnermi AWG 2016-ip internet-imi quppernissaa siullermeersumik ilisaritinneqarpoq, soorluttaaq maskotti oqaasinnaassarlu - slogan – aamma qaaqqusanut ilisaritinneqartut.

Visit Greenland saqqummersitsiveqarluni tikilluaqqusivoq Nunattalu issittormiut sinniisaannut allanut tusagassiortunullu ilisaritinneqarnerani peqataalluni. Kimmernaq, Malik Hegelund Olsen aamma Adam Kjeldsen namminneq nipilersorlutik erinarsorlutillu aliikkusersuipput.

- Fairbanks-imi ataatsimoorluta misigisatta 2016-imi Issittormiut unammiuaaqatigiinnissaannut AWG-mut suleqatigiilluta pitsaasunik aallaavissaqartilerpaatigut siunissamilu ataatsimoorussamik suliassatsinnut pitsaasumik tunngavissaqartilerluta, oqarput Asii Chemnitz Narup aamma Nich Nielsen.