Naalakkersuisut Siulittaasuat apeqqarissaarnermi

 

Naalakkersuisut Siulittaasuat Aleqa Hammond Inatsisartut ataatsimiinneranni apeqqarissaarfigineqarpoq pingasunngornermi martsip 19-ianni 2014. Apeqqutit arlaqartut Inatsisartuni ilaasortanit apeqqutigineqartut makkuninnga imaqarput:

Doris Jakobsen (S): Kalaallit Nunaata Danmarkillu uran pillugu suleqatigiinnerannut tunngasut.

Harald Bainco (IA): Uuliap akiata appartinneqarnissaannut kiisalu ilinniagaqarnersiutinik qaffaanissamut tunngasut.

Gerhard Petersen (A): Naalakkersuisut suliffissaaleqinermut akiuiniarlutik iliuuserisaannut kiisalu Naalakkersuisut ataatsimiittarnerinut tunngasut.

Hans Enoksen (PN): Naalakkersuisut suliffissaaleqinermut akiuiniarlutik iliuuserisaannut kiisalu illorsuarnik timersortarfiusunik iluarsartuussinissamut tunngasut.

Per Berthelsen (S): Naalakkersuisut Siulittaasuata Aleqa Hammondip kiisalu Aatsitassaqarnermut Inuussutissarsiornermullu Naalakkersuisup Jens-Erik Kirkegaardip aatsitassat pillugit suleqatigiinnerannut tunngasut.

Ane Hansen (IA): Naalakkersuisut suliffissaaleqinermut akiuiniarlutik iliuuserisaannut kiisalu Avaleraasartuunik misileraalluni aalisartitsinermut Avaleraasartuunillu misileraalluni aalisartitsinermi akuersissutinik qassinik tunniussisoqarsimaneranut tunngasut.

Gerhard Petersen (A): Nunasisut pillugit siunissami inatsisissamut tunngasut kiisalu nunaqavissunik ilinniagaqarsimasunik sulisoqarnikkut atorfinitsitsisarnermut kiisalu Namminersorlutik Oqartussat ingerlatsiveqarfiinik namminersortungorsaanermut tunngasut.

Hans Enoksen (PN): Utoqqalinersiaqalernissamut ukiorititaasut 65-iniit 67-inut qaffatsinneqarnissaannut tunngasut.

Ruth Heilmann (S): Naalakkersuisut innuttaasunut sinerissami ataatsimiitsitsisarneranni innuttaasut oqariartuutaasa sunik imaqarnerannut, illoqarfinnut annerusunut eqiterutsitsinermut kiisalu aalisakkanut tunitsivissaaleqinermut tunitsivinnillu ineriartortitsinissanut tunngasut.

Aqqaluaq B. Egede (IA): Nunatsinni aatsitassarsiorfinnik aallartitsinissanut Naalakkersuisut pilersaarutaannut tunngasut.

 

Apeqqarissaarnermi assilisat.