Umimmaat neqaannik tunisinermik nakkutiginninneq

Uumasut nakorsaqarfiata umimmannik tunisineq nakkutigivaa.

 

Sisimiuni Maniitsumilu piniartut Kangerlussuarmi neqilerivimmut umimmaat neqaannik februaarimi tunisisarput.

Tunisinerup nalaani uumasut nakorsaqarfiata inuussutissalerinermullu oqartussaqarfiup umimmannik toqoraaneq tunisassiornerlu nakkutigisarivaa.

Inatsisit naapertorlugit uumasunit nunamiutanit neqit nunatsinni tuniniagassat nakkutigineqartussaapput. Taamaattumik uumasut nakorsaannik, taassumaluunniit ilinniagaata assipaluanik ilinniarsimasoq nakkutiginnittussaavoq. Nakkutilliisussaq uumasut nakorsaqarfiannit inuussutissalerinermullu oqartussaqarfimmit toqqarneqartarpoq.

Uumasut nakorsaata neqit uumasut neqaat nappaammik eqqorneqarsimanngitsut nappaateqanngitsut tunisassiarineqarnissaat miluuffigisaminnullu ilanngartuisunik uumasuaraqannginnissaat qulakkeertussaavaa. Eqqiluilluinnartumi neqilerisoqarnissaanik, nerisassiarineqartullu isumannaatsumik tunisassiarineqarnerinik qulakkeerinnittussaalluni.Tunisassiorfiit tunisassiornermilu atortut sulisullumi eqqiluilluinnartuunissaat piumasaqaataavoq.

Napparsimalluni timmittoq meriartorlu neqilereqqusaanngilaq. Uumasut nakorsaata aamma qulakkeertussaavaa uumasunut toqoraaviit pimasaqaatit naapertorlugit tunisassiortuunersut. Taamaalilluni tunisassiat uumasut nakorsaqarfiannit inuussutissalerinermullu oqartussaqarfimmit qulakkeerneqarsimasut pisisartunit pisiarineqarsinnaalertarlutik.

- Pisariaqarluinnarpoq neqilerinermi maskiinat allallu atortut nakkutigissallugit, soorlu saviit, pilattuutit neqinullu nississutaasartut sisaaneri aamma qulakkiissallugit. Neqilerinermi atortut tamarmik aamma paarilluagassaapput, tunisassiulinnginnermilu taakku eqqilueqqissaartuusariaqarput, pisariaqartitsineq naapertorlugu eqqiluisaarneqartassallutik. Neqilerinermi atortut allat aamma tunisassiulinnginnermilu eqqilueqqissaartuunissaat qulakkeerneqartarput, taakku pisariaqartitsineq naapertorlugu eqqiluisaarneqartassallutik, taama Kangerlussuarmi tunisassiorfimmi nakkutilliisoq, uumasut nakorsaat Lajos Muzs oqarpoq.

Toqoraaviit akuerisaassapput

 
Uumasunik toqoraaviit Namminersorlutik Oqartussanit akuerineqarsimasussaapput. Toqoraavimmik pilersitsisoqassappat suliffeqarfiit inuussutissaleriffiusut pillugit Namminersornerullutik Oqartussat nalunaarutaanni piumasaqaatit naammassisimaneqartariaqarput.

 
Soorlu piniartunut tunisinermi ilitsersuusiortoqartussaavoq Kangerlussuarmi toqoraavimmut umimmaat tunineqartussatut pisarineqartut pitsaasumik suliarineqarnissaannut malittarisassamik.

Piniartut umimmak toqoriiginnarlugu iggiaa sukangasumik qilissavaat erlualu aamma savimmik piissallugu.
- Piniartut umimmaat aqajaat tunisilinnginnerminni ammarsimasussaavaat erlaviilu peerneqarsimasussaallutik, tingua maassaa tartuilu attatiinnarneqassallutik. Timaaniittut allat, soorlu oqaa ilanngullugit toqoraavimmukaanneqartussaapput, Lajos Muzs oqarpoq.

Umimmaat neqaannik tunisineq februaarip 10-anni aallartippoq 28-anni taamaatilluni.