Aasianni aalisartut ataatsimeeqatigineqarput

Aalisarnermut Piniarnermullu Naalakkersuisup Finn Karlsenip Aasianni aalisartut ataatsimeeqatigai.

 

Aalisarnermut, Piniarnermut Nunalerinermullu Naalakkersuisup Finn Karlsenip Qeqertarsuup Tunuata illoqarfiinut angalanerminut atatillugu, ippassaani Aasianniinnerminni Aasianni KNAPK-ip immikkoortortaqarfiata siulersuisuinik ataatsimeeqateqarpoq.

Ataatsimiinnermi ilaatigut oqaluuserineqartut ilaat tassaavoq Aasianni aalisartut pisatik Ilulissani tunitsivinni sooq tunisinnaasannginneraat.

- Aamma oqaluuserineqartuni eqqumiiginarsinnaasoq alla tassaavoq aalisartut pisarisuukkaminnik sooq tunisisinnaatitaannginnerat, Finn Karlsen oqarpoq.

 
Aalisarnermut, Piniarnermut Nunalerinermullu Naalakkersuisup Nuummut uteriaruni pineqartut misissortissallugit oqarpoq.

Ataatsimiinnermi Akunnaami KNAPK-ip immikkoortortaani ilaasortat ilaat aamma ataatsimeeqataapput.
- Immikkoortortaqarfiup sinniisuisa piumasarilluinnarpaat nunaqarfimmi tunitsivimmut tunisisinnaanerulersinnaanissartik, tamakkiisumik tunisisoqarsinnaasanngimmat.

Finn Karlsen Aasianniinnermini Polar Seafoodip tunitsiviutaanut Polar Raajamut aamma pulaarpoq.
Innuttaasunik ataatsimiititsisoqarmat tusarnaariartut 100-it missaannik amerlassuseqarput.

Tusarnaariartut ilaasa paaserusuppaat inussuttut aalisarusuttut aalisarsinnaanermut akuersissummik sooq tunineqartannginnersut.

- Kingumut nassuiaassivunga inuusuttut maannakkut aalisarsinnaanermut akuersissummik peqanngitsut akuersissummik siunissami tunineqartarsinnaanerinik naalakkersuisoqarfik maannakkut misissuisoq, Aalisarnermut, Piniarnermut Nunalerinermullu Naalakkersuisoq erseqqissaavoq.

 
Finn Karlsen Ilulissanut ullumi tallimanngornermi tikippoq, aqagu Nuummut ingerlaqqissalluni.