Atsiortitsinernik katersuinermi tunniussineq

Inuit Aqqinut Akuersisartut Inuit aqqi pillugit inatsimmi Kalaallit Nunaannut 1986-imi atuutilersinneqartumi aalajangersagaq atorlugu kalaallit aqqi atitut siulequtitut atorneqarsinnaanersut atorneqarsinnaannginnersulluunniit aalajangiisarput.

Kristine aamma Mads Peter Heiselberg ungasinngitsukkut atsiortitsinernik katersuipput, tassa Inuit Aqqinut Akuersisartut oqaatsip inuuneq inuit aqqisut akuerineqarnissaanik qinnuteqaatertik itigartimmagu, meeqqamut kingunipiloqarsinnaasutut tunngavilersuutigalugu.

Inuit Aqqinut Akuersisartut aalajangiinera inuiaqatigiinni oqallisaangaatsiarpoq. Oqallinneq soqutiginarpoq, inuiaqatigiinnilu inuit aqqi pineqartillugit oqaatsitigut kulturikkullu ineriartornerit pillugit eqqarsalersitsilluni.

Kingullertigut oqallinnerup tassunga peqatigitillugu takutippaa inuit aqqi pillugit inatsisip misissorneqarnissaanik pisariaqartitsisoqartoq. Maannakkut inatsisitigut tunngaviit atsiisarnermilu najoqqutassat aqqit ajoqutaasutut igineqarsinnaaneranut suna pisariaqarnersoq annertunerusunik tunngavissiinngillat. Nunani allani takusarparput aqqit pillugit inatsisit atoruminarnerulersillugit akuerineqartartut, piffissanngunnginnerpalu aqqit pillugit maleruagassiat ilaatigut sulinermi erseqqarinnerusunik sinaakkusiinissaq qulakkeerniarlugu misissorneqarnissaa.

Kristine aamma Mads Peter Heiselbergikkut atsiortitsinernik katersaat Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup Nick Nielsenip allaffiani ulloq 6. februar nal. 14.00 tunniunneqassapput, Inuit Aqqinik Akuersisartut tassunga aamma ilaserineqarput.