Anaanamut meeraaqqamullu ikiuukkusuttut

Småbørnskonsulenter Meeraaqqanut siunnersortinngorlaat 21-it naartulinnginnermi, naartunermi ernereernermilu anaananik siunnersuinikkut ilitsersuinikkullu ikiuutissapput..

Qanimut pitsaasumillu anaanap inoorlaallu ataqatigiinnerat meeqqap peqqinnartumik ineriartornissaanut kingornalu inersimasutut inuunerissuunissaanut aalajangiisuulluinnarpoq. Ajoraluartumik anaanap meeqqallu qanimut ataqatigiinnerat isumaminik pilersanngilaq. Pingaartumik anaanamut nammineq peroriartornermi ajornartorsiuteqarsimasumut, meeqqamut ungakkiussinissaq ajornakusoortuuvoq. Meeraaqqanut siunnersortinngorlaat 21-it tassaapput sumiginnaanerup ajorsigaluttuinnartitsisarneranut kipisitseqataasussat.

Meeraaqqerisut, ernisussiortut, perorsaasut kommuninilu inunnik isumaginninnermi siunnersortit, anaanat ajornartorsiutillit ersiutaannik takunnissinnaanngorlugit ilinniartitaanerat nutaaq peqqinnissaqarfimmit isumagineqarpoq.

Siusinaartumik iliuuseqarneq
Dortinguak F. Davidsen Ilulissani Ilaqutariinnut Sullissivimmeersoq ulluni makkunani meeraaqqanut siunnersortitut ilinniakkaminnik naammassinnittut ilaat, ukiut aappaa qeqqa ilinniartitaaneq siuariarnertut annertuutut isigaa:

-Perorsaasutut ilaqutariinnillu katsorsaasutut sulininni, ilaqutariit mikisunik meerartallit naapittarpakka, ilinniagaralu nutaaq aqqutigalugu siusinaarnerusumik ikiuisinnaanissannut sakkussaqalerpunga. Sumiginnaanermik pinaveersaartitseqataasinnaanera neriuutigaara.

Kommunit suleqatigalugit ilinniartitsinerup iluatsissinnaasimanera Peqqissaasut qullersaata Ella Skifte-p tulluusimaarutigalugulu nuannaarutigaa.
-Ilinniartitaaneq nutaaq neriuuteqarfigeqaara. Meeraaqqanut siunnersortit, naartuleqqaarnermiilli meeqqap arnaatalu ataqatigiinnerannik ikorfartuutaasumik aalajangersimasumik periuseqalerput. Meeqqammi ukiuani siullermi angajoqqaanut attaveqarnerup- inuunerup sinnerani meeqqap periarfissaanut aalajangiisuusarnera ilisimavarput.

Siunnersuisut naartunerup nalaani anaananngortussat sanngiiffillit angajoqqaanngornissamut piareersarsinnaavaat. Tamatumani meerartaassamut attaveqalernissaq, naartusullu nammineq anaanaaneq angajoqqaajunerlu pillugit takorluugai qitiutinneqarput. Arnap qanimut malittarineragut, ajortoqarneranut ersiutaasinnaasut kinguneqarluartumik qisuariarfigineqarsinnaapput.
Ernereernermi meeqqap pisariaqartitai pillugit angajoqqaanngorlaat tapersersorneqarsinnaapput. Angajoqqaat meeqqap iliuutsimigut takutitaanut silatusaartumik qisuariaateqarnissaat, namminnerlu pisariaqartitaminnik tunulliussisinnaanissaat pingaaruteqarpoq. Taamatuttaaq angajoqqaat meeqqalu ataqatigiinnerisa sunniivigeqatigiinnerisalu ilaatigut isit toqqarlugit timikkullu atuumanikkut nukittorsarniarneqarput.

Paasissutissat
Paasissutissat sukumiinerusut suliniummik ataqatigiissaarisoq Birgit Hansen, oqarasuaatikkut 344266 attavigalugu pissarsiassaapput.