Finn Karlsen Avannaani angalassaaq

Aalisarnermut, Piniarnermut Nunalerinermullu Naalakkersuisoq Finn Karlsen Ilulissanut, Uummannamut Upernavimmullu februaarip 6-annit 13-annut angalassaaq.

Nunaqarfik Upernavimmut qaninnerpaaq Aappilattoq aamma tikissavaa. Naalakkersuisunngorlaap aalisartut piniartullu ataasiakkaat peqatigiiffillu tikillugit oqaloqatigissallugit pingaartittorujussuuaa.

Illoqarfinni nunaqarfimmilumi tikitamini KNAPK-ip immikkoortortaasa sinnissaannik ataatsimeeqateqassaaq, soorlu aamma SQAPK-ip Ilulissani sinniisaanik aamma ataatsimeeqateqassasoq.
Aamma Upernavik Seafood ataatsimeeqatigissavaa.

Upernaviup nunaqarfittaasa ilaanni qaleralinnik tunitsiveqartitsiniarneq piffissami kingullerni oqallisaangaatsiarpoq.

- Angalaninni Upernavik Seafoodimeersunit ataatsimeeqateqarnissara ilaatigut siunertaraara, nunaqarfinni tunitsiveqartitsiniarneq pingaarnertut ataatsimiissutigineqassalluni, Finn Karlsen erseqqissaavoq.

Finn Karlsen februaarip 6-anni Ilulissaniissaaq, februaarip 8-anni Uummannamukassalluni. Februaarip 10-anni Ilulissaneeqqissaaq aqaguni Upernavimmukassalluni. Avannaani angalanini februaarip 13-anni naggasissavaa.