Martin Møller angusarissaaqaaq

Martin Nick

”Martin Møllerip ukiuunerani OL-eqarnermi peqataanera angusaalu assorsuaq pitsaapput”. Taamatut oqarpoq kultureqarnermut Naalakkersuisoq Nick Nielsen ukiuunerani Sochimi OL-eqarnermi Martin Møllerip 50 kilometerimut angutinut oqilaniuteqataanerani malinnaareerluni.

”Martin Møllerip nunarsuarmi sisoraatinik ujakkaartartunut nukittunerpaanut unamminera malinnaaffigalugu namminerlu takullugu qanoq sisoqqaritsiginersoq qanorlu pikkorinnerpaarpaanut malinnaalluartigisinnaanersoq assut pisanganarpoq. Aamma immikkuullarilluinnartumik akiuukkumatussuseqarnera takullugu nuanneqaaq. Aallaqqaarnerminiilli akiuutilerpoq nikallujuilluinnarlunilu apuuffissamut apuunnissami tungaanut akiuulluni, 5 minutsinik russenit OL-imi ajugaasunit nukittoorsuarnit kingulliulaatsiaannarluni. Isumaqarpunga akiuukkumatussutsip taassuma nunatsinni sisoraatinik ujakkaartartuni pikkorinnerpaanngorsimaneranut peqqutaasoq sisorartartunngortussanullu maligassiuisunngortillugu, Nick Nielsen oqarpoq.”

Naalakkersuisoq nangippoq: ”Nunarsuarmi ujakkaartartut nuimanerit pikkorinnerpaanik sungiusaasoqarlutillu ikiorteqartut Martin Nuup eqqaani nunakkut arpattoq sisorarfinniluunniit sungiusartoq naammattoorneqarsinnaasarpoq. Martinnip OL-imi peqataanera angusaasoq immikkuullarilluinnartoq tamassuma ersarissisippaa angusarlu nunatsinni timersortartunut timersortalerumaartunullu annertuumik maligassiuisuuvoq.”

Nick Nielsen nangilluni oqarpoq: ”Aasianni ilinniarnertuunngorniartillunga Martin Møller Aasianni ataartoq takusarnikuuvara kinalu taamani isumaliorpa OL-imut taamaalluni peqataajumaartoq. Martinnip angusai assorsuaq pikkugaakka inuillu Aasianni ASP-miittut nunarsuarmiittullu allat Martinnimut sungiusaallutillu tapersersuilluarsimasut ataqqillugit oqarfigerusuppakka.”

Sochimi OL-erfiusumi tikeraarneq sisoraatinik ujakkaarluni oqilaniunnermut tunngaannanngilaq:
Nick Nielsenip Kunngissaq Frederik IOC-mi (Nunat tamat OL-eqartarnermut ataatsimiititaliaanni) ilaasortatut Sochimi peqataasoq naapeqatigaa. Aamma naapinneqarpoq IOC-mi ilaasortaq nunarsuarmilu badmintonnertartut kattuffiata siulittaasua Poul Erik Høyer. ”IOC-imi sulineq paasisaqarfigaara nunatsinnilu timersoqatigiit kattuffiat suleqatigalugu timersornikkut qaffasissumik angusaqarsinnaasutut piukkunnaatillit sullinneranni aningaasassarsiorsinnaanerup siunissami qanoq pisinnaara isumassarsiffigalugu.”

Danmarkimi timersoqatigiit kattuffiata siuittaasua danskillu OL-eqartarnermi ataatsimiititaliaata siulittaasua Niels Nygaard aamma ataatsimeeqatigineqarpoq. Danmarki Nunarpullu timersornikkut assigiinngitsorpassuartigut tapersersoqatigiissinnaapput tamallu timersorneri immikkullu piginnaasallit sulissunneri qanoq ingerlanneqarsinnaasut akunnitsinni isumassarsioqatigiiffigisinnaavagut soorlu aamma siunissami nunatta OL-imi peqataasarnissaata malunnartittarnissaa aamma eqqartukkat ilagigaat.

Kiisalu Team Danmarkimi pisortap Michael Andersenip ilaatigut oqaluttuaraa timersullaqqissunik Danmarkimi inerisaanermik suliniutit qanoq ingerlanersut, aalajangiinerit toqqaanerillu suut pisariaqartarnersut minnerunngitsumillu kikkut suliamut taamatut ittumut peqataatinneqassannginnersut timersullammannik nukittuunik nunami inerisaassagaanni. Ataatsimiinnerni aamma nunatsinni timersoqatigiit kattuffiani pisortaq Carsten Olsen kiisalu Elite sport Greenlandimi siulittaasoq Finn Meinel peqataapput. Marluullutik angalanermi pissarsiarineqartut naammagisimaarluarlugit oqaatigaat ilisimatitsissutigalugulu siunissami nunatsinni timersornermik siuarsaanissaminnut isumassarsiarqarluarsimallutik.

Nick Nielsen-imiit annertunerusumik oqaaseqartoqarnissaa pillugu Naalakkersuisumut allattaagallartoq Nauja Brøns oqarasuaammut normu 550 470 attavigineqarsinnaavoq.