Qilalukkanik qernertanik piniarneq ammarpoq

Qeqertarsuarmi Uummannamilu qilalukkanik qernertanik piniarneq ammarpoq

Qeqertarsuup Uummannallu aqutsiveqarfiini piniartut peqatigiiffii aamma piniarnermut nakkutilliisut ataatsimeeqatigereernerisigut Qeqertarsuarmi Uummannamilu qilalukkanik qernertanik pisat pillugit paasissutissanik eqqortunik ullumi Aalisarnermut Piniarnermut Nunalerinermullu Naalakkersuisoqarfik tigusaqarpoq.

Aqutsiveqarfinni pineqartuni qilalukkanik qernertanik erngertumik piniartoqarsinnaanngorpoq.

Qeqertarsuup Tunuani qilalukkanik qernertanik piniarneq Imerissut eqqaanni pisarpoq, piniartummi Qeqertarsuup Tunuani aqutsiveqarfiit amerlanersaanneersut tamaanga piniariartarput, taamatullu assigiinngitsunit aqutsiveqarfinneersut ataatsikkut piniartarlutik. Aqutsiveqarfinneersunit allaniik ilaqarlutik piniartaramik, pisaasimasut aqutsiveqarfinnut sorlermut tutsissallugit ajornakusoorsinnaasarpoq. Pisat kikkut nalunaarutigineqarnissaat piniartunit isumaqatiginngissutigineqartillugu, aqutsiveqarfinnut pisassiissutigineqartuniit sorlernut ilanngaatigineqarnissaat piviusumik ajornartorsiutaasarpoq.

Ataatsimiinnermi oqaluuserineqarpoq qilalukkat qaqortat qernertallu piniarneqaraangata siunissami qanoq ililluni malittarisaliorneqarsinnaanersoq, tutsuiginartumik pisaqarsimanermik nalunaarsuineq qulakkeerniarlugu.

Kommunini sumiiffinnilu piniarnermut nakkutilliisut pisat nalunaarutigineqarsimanngitsut pillugit eqqortunik paasisaqarsimalerput, Naalakkersuisoqarfiullu taakku Uummannami malittareqqissavai, pineqartunut allakkatigut saaffiginnissuteqarnikkut.

Aasianniit pisanik nalunaaruteqartoqarnissaa suli Naalakkersuisoqarfimmit utaqqimaarneqarpoq.

Eqqortunik Naalakkersuisoqarfimmut nalunaaruteqartoqariarpat, aqutsiveqarfimmi piniarsinnaalerneq ilisimatitsissutigineqarumaarpoq.

Aqutsiveqarfiit pineqartut tamarmik piniarnermik nakkutilliisoqartinneqassapput.

Aalisarnermut, Piniarnermut Nunalerinermullu Naalakkersuisoqarfik tallimanngormat nalunaarpoq, aqutsiveqarfinni Qeqertarsuup Tunuani Uummannamilu qilalukkanit qernertanit pisaqartarnermut atatillugu nalunaarsorneqartarneri amigarpallaarmata, qernertanik qilalugarniarneq unitsinneqartoq, tamannalu piaartumik atuutsinneqarluni.